Senat Tóraǵasy Máýlen Áshimbaev bastaǵan AES salýdy qoldaý jónindegi halyqtyq shtabtyń músheleri búgin Almaty qalasynda ǵalymdarmen, JOO oqytýshylarymen jáne Qazaqstan halqy Assambleıasynyń ókilderimen kezdesti. Shtab quramynda depýtattar, sarapshylar jáne qoǵam qaıratkerleri bar. Kezdesýlerde AES salýǵa qatysty referendým aıasyndaǵy máseleler talqylandy, dep jazady Egemen.kz.
Ǵ.Dáýkeev atyndaǵy Almaty energetıka jáne baılanys ýnıversıtetiniń jas ǵalymdarymen jáne professor-oqytýshylar quramymen kezdesýde sarapshylar men Shtab músheleri ǵylymnyń múmkindikterin arttyrý jáne óndiriske ınnovasııalardy keńinen engizý úshin tıimdi jaǵdaı jasaý negizgi mánine nazar aýdardy. Sondaı-aq Qazaqstanda kómirtegi qaldyqtaryn azaıtý baǵytyndaǵy jumysty odan ári jandandyrýdyń mańyzdy ekeni sóz boldy.
«Memleket basshysy Qasym-Jomart Kemeluly Toqaevtyń bastamasymen 6 qazanda Qazaqstanda AES salý máselesine qatysty respýblıkalyq referendým ótedi. Osyǵan baılanysty Halyqtyq shtab referendýmnyń mindetterin jáne osy salada týyndaıtyn basqa da máselelerdiń mańyzyn túsindirý jumystaryn júrgizip jatyr. Búginde elimiz kómirqyshqyl gazynyń jan basyna shaqqandaǵy shyǵaryndylary boıynsha álemde aldynǵy oryndardyń birin ıelenedi. Eýropalyq Odaq elderinde 2026 jyldan bastap kómirtegi salyǵy engiziledi. Basqa elderden taýarlar ımporttaǵan kezde kómirqyshqyl gazynyń shyǵaryndylary úshin qosymsha eleýli alymdar alynady. Bul bizdiń eksporttaýshylar úshin qıyndyq týǵyzatyny anyq. Sondyqtan ekonomıkamyzda kómirtegi qaldyǵyn azaıtyp, 2060 jylǵa qaraı kómirtegi beıtaraptyǵyna qol jetkizýimiz kerek», dedi Máýlen Áshimbaev.
Sondaı-aq Shtab músheleri Qazaqstan halqy Assambleıasynyń ókilderimen kezdesti. Senat Tóraǵasy 6 qazanda ótetin jalpyulttyq referendým eldiń damýy jolynda aıryqsha mańyzǵa ıe ekenine basa mán berdi.