Qostanaıda sport fakýltetiniń stýdenti esirtki taratqany úshin 11 jylǵa bas bostandyǵynan aıyrylǵan, dep habarlaıdy Egemen.kz Polisia.kz-ke silteme jasap.
Eske sala keteıik, buǵan deıin polısııa oblys ortalyǵynyń túkpir-túkpirinde esirtki taratýmen aınalysqan eki adamdy ustaǵan edi. Olardyń biri dene shynyqtyrý fakýltetiniń 4-shi kýrsynda oqyǵan.
Anyqtalǵandaı, kúdiktilerdiń jaldamaly páterin tintý kezinde qyzmetkerler 4 keliden astam sıntetıkalyq esirtki – «a-PVP» tárkilegen. Sonymen qatar elektrondy tarazylar, 240 mını-magnıtter, elektr taspasy, folga jáne esirtkini oraýǵa arnalǵan basqa da qurylǵylar tabylǵan.
«Tárkilengen partııanyń quny qara naryqta shamamen 100 mln teńgeni quraıdy. Polıseıler aınalymǵa 15 myńnan astam dozanyń jiberilýine jol bermedi. Esirtki zattaryn asa iri mólsherde taratqany úshin sot úkimimen ekeýine de 11 jylǵa bas bostandyǵynan aıyrý jazasy taǵaıyndaldy», delingen habarlamada.
Úkim zańdy kúshine endi.
Aıta keterligi, jyl basynan beri Qostanaı oblysy PD esirtki qylmysyna qarsy is-qımyl jónindegi qyzmetkerleri zańsyz aınalymnan 63 keli túrli esirtki zattaryn tárkilegen.