Aldaǵy 24-25 qyrkúıek kúnderi Almatyda alǵash ret «MYSTIC AYURVEDA & WELLNESS EXHIBITION» atty Aıýrveda kórmesi ótpek, dep habarlaıdy Egemen.kz.
Aıýrveda - 5000 jyldan astam ýaqyt buryn paıda bolǵan dástúrli úndilik medısına júıesi bolsa, ol keselder adam sanasyndaǵy teńgerimsizdikten nemese kúızelisten týyndaıdy degen ustanymǵa negizdelgen. Aıýrvedanyń basty qaǵıdasy sonda - durys tamaqtaný, dıeta jáne ómir salty jáne shóptik preparattardyń kómegimen denedegi, aqyl-oı men sanadaǵy tepe-teńdikti qalpyna keltirý arqyly aýrýlardyń aldyn alý men shıpasyn tabý.
Sonymen bul kórme Úndi Aıýrvedasynyń, onyń shópteri men densaýlyqty saýyqtyrýǵa arnalǵan ónimderiniń qudiretin kórsetedi.
Densaýlyq saqtaý salasyndaǵy erekshe oqıǵaǵa oraı ótken baspasóz máslıhatynda otandastarymyz úshin kórmege tirkelý men qatysý tegin júretini málim boldy.
Aıýrveda jáne saýyqtyrý kórmesin Qazaqstandaǵy Úndistannyń Tótenshe jáne О́kiletti Elshisi doktor T.V.Nagendra Prasad erteń, 24 qyrkúıek kúni saǵat 9:30-da Rixos Almaty qonaqúıinde resmı túrde ashady.
Kórmede Úndistannyń aıýrvedalyq ónim óndirýshileri shıpalyq qyzmetterge qosa, aıýrvedııalyq dári-dármekter men shóp ónimderiniń alýan túrin usynǵaly otyr. Oǵan qosa kórmege qatysýshylar Úndistannyń jetekshi mamandarynan, aıýrveda dárigerleri men óndirýshilerinen arnaıy ilim alý múmkindikteri qarastyrylǵan.
Kórme baǵdarlamasyna ınteraktıvti B2B kezdesýleri, aıýrvedany tájirıbede qoldanýdyń tikeleı kórsetilimi men aıýrvedııalyq dárigerlerdiń keńesteri kiredi.
Kórmege kelýshiler aıýrvedanyń sana, dene men rýhtyń tepe-teńdigin saqtaýǵa qalaı kómektesetinin, jalpy baqýattylyqqa qalaı yqpal etetinin, densaýlyqtaǵy naqty kinárattardy qalaı sheshýge bolatynyn bile alady.
Arnaıy sessııalar dıeta men tamaqtaný, detoksıkasııa ádisteri, ıoga, medıtasııa men shóp dárilerdi qoldaný sııaqty, Aıýrvedanyń ártúrli qyrlaryn qozǵaıdy.
Aıýrveda kórmesin Vipex Associates kompanııasy Biz Network, MarketExpoGroup kompanııalarymen men birlesip, Ayushexcil - Úndistannyń Aıýrvedany nasıhattaý Keńesiniń qoldaýymen uıymdastyryp otyr.
Oraıy kelip turǵanda, qazirgi tańda aıýrveda sektorynyń keńeıýi jańa ınvestısııalyq múmkindikter ashyp, oǵan dúnıe júzindegi iri kásipkerler, tehnologııalyq kompanııalar men medısınalyq ortalyqtar tartylyp jatqanyn atap ótýge bolady.
Almaty