Abaı atyndaǵy Qazaq ulttyq pedagogıkalyq ýnıversıtetiniń oqytýshylary «Bolashaq» baǵdarlamasynyń «500 ǵalym» jobasy aıasynda Amerıkanyń Ýrbana-Shampeın qalasyndaǵy Illınoıs ýnıversıtetinde ǵylymı taǵylymdamadan ótip jatyr.
Akademııalyq jazý, joǵary bilim berý transformasııasy jáne pedagogıkalyq ınnovasııalar boıynsha kýrstardan ótip jatqan fılologııa fakýlteti orys tili men ádebıeti kafedrasynyń aǵa oqytýshysy, PhD F.Erjanova, qaýymdastyrylǵan professor, PhD S.Serikova, aǵa oqytýshy, PhD G.Jandykeeva, magıstr A.Omarovanyń aıtýynsha, taǵylymdama oqytý daǵdysyndaǵy ózgeshelikterdi ǵana emes, sıfrlandyrý týraly keńinen maǵlumat alýǵa, bilim sapasyn jaqsartýǵa yqpal etedi.
«Memleket basshysynyń tapsyrmasymen bilim salasyn eń úzdik halyqaralyq standarttarǵa saı damytý maqsatynda zamanaýı tehnologııalardy ıgerý, bilim salasyndaǵy halyqaralyq ozyq tájirıbelerdi meńgerý mindeti tur. Taǵylymdama kásibı quzyrettilikti nyǵaıtýmen qatar ǵylymı baılanysty damytýǵa berilgen zor múmkindik», deıdi oqytýshylar.
Ýnıversıtet oqytýshylary tórt aı boıy aǵylshyn tili kýrstaryna, «English Speaking Club»-qa qatysty. Bilimin jetildirýmen birge Amerıka eliniń mádenıetimen, tarıhymen tanysty. Olar Illınoıs shtatyndaǵy tarıhı oryndar, sonyń ishinde AQSh-tyń 16-prezıdenti Avraam Lınkolnniń týǵan qalasy Sprıngfıldke kelgendegi áserimen bólisti. Munymen qosa Qazaqstannyń AQSh-taǵy elshisi Erjan Ashyqbaevpen, «Bolashaq» baǵdarlamasynyń ókili Rýslan Sákeevpen kezdesip, yntymaqtastyq pen tájirıbe almasý barysyn talqylady.
Sheteldik ýnıversıtet pen ǵylymı ortalyqtarmen yntymaqtastyq ornatý elimizdegi joǵary oqý oryndarynyń ǵylymı áleýetin arttyryp, osy saladaǵy óz tájirıbemizdi de keńinen nasıhattaýǵa múmkindik beredi.
ALMATY