Búgin elordada Astana Media Week-2024 aptalyǵy bastaldy. QR Mádenıet jáne aqparat mınıstrligi uıymdastyrǵan dástúrli is-shara bıyl da shymyldyǵyn túrdi, dep habarlaıdy Egemen.kz.
Otandyq medıaındýstrııany damytý jáne iskerlik qatynastardy kúsheıtý baǵytyndaǵy aptalyqtyń ashylý saltanatynda QR Mádenıet jáne aqparat vıse-mınıstri Qanat Ysqaqov mınıstr Aıda Balaevanyń atynan qatysýshylardy quttyqtady.
Vıse-mınıstr Astana Media Week elimizde ǵana emes, jalpy medıa keńistikte mańyzy zor is-shara ekendigin, dástúrli is-sharanyń ótkizilýimen otandyq medıaındýstrııa jańa qarqyn alyp jatqandyǵyn atap ótti.
Astana Media Week-tiń birinshi kúni «Qazaqstan álemdik aqparattyq alańda» paneldik sessııasymen ashyldy. Taqyrypqa oraı alǵashqy bolyp pikir bildirgen vıse-mınıstr Qanat Ysqaqov Qazaqstan álemdik aqparat salasynda óz ornyn aıqyndaýy kerektigin aıtty.
«Osy baǵytta elimizde aqparattyq doktrına ázirlendi. Onyń eń basty qaǵıdaty - aqparattyq egemendigimizdi saqtaý, BAQ salasynyń básekege qabilettiligin arttyrý, sheteldik nemese syrtqy táýekelderge tótep berý. Sonymen qatar Onlaın platforma jáne mass-medıa týraly zań jobasy qabyldandy. Eń birinshi maqsatymyz - otandyq kontentti arttyrý jáne onyń sapasyn kóterý», dedi vıse-mınıstr.
QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Erkin Tuqymov elimizdegi sıfrlandyrýdyń artyqshylyǵy men kemshiligine toqtaldy.
«Qazaqstan sıfrlandyrý boıynsha aldyńǵy orynda kele jatyr. Ásirese pandemııa kezinde elimizde onlaın jumystar kóbeıdi. Kaspi bank-tiń onlaın qyzmeti de halyqtyń ómirin aıtarlyqtaı jeńildetti. Alaıda, sıfrlandyrý damyǵan saıyn alaıaqtar da kóbeıip keledi. Batys elderi nege sıfrlandyrýǵa túbegeıli kóshkisi kelmeıdi? Sebebi ózderi týraly aqparattyń alaıaqtardyń qolyna túskenin qalamaıdy», dedi spıker.
Paneldik sessııa barysynda Tájikstan Respýblıkasynyń «Djahonnamo» memlekettik aqparattyq telearnasynyń dırektory Sadrıdın Shamsýddınzoda Tájikstandaǵy telearnalardyń jumysy týraly baıandady.
Jibek Joly/Silk Way telearnasynyń basqarýshy dırektory Erkejan Kúntýǵan telearnanyń basty ustanymy - qandaı aqparat taratsa da álemge óziniń kózqarasyn bildirý ekenin aıtty.
«Biz álemge ózimiz týraly aıtamyz jáne kez kelgen saıası oqıǵaǵa kózqarasymyzdy bildiremiz. Sheteldik arnalar bizdi qaraıdy jáne biz jarııalaǵan sarapshylardyń pikirlerin surap alyp bólisedi. Alǵa qoıyp otyrǵan maqsatymyzdyń biri - Ortalyq Azııanyń daýysyna aınalý. Orta Azııa elderiniń ekologııalyq, gender, bala quqyǵy sekildi ortaq máselelerin kóteretin bolamyz», dedi telearna dırektory.
M.S.Nárikbaev atyndaǵy KAZGIýÝ ýnıversıteti AQ basqarma tóraǵasynyń orynbasary Erbolat Muhamedjanov táýelsizdik alǵanymyzǵa 30 jyldan assa da, Qazaqstannyń álemdik deńgeıde aqparat tarata alatyn jýrnalısterdi daıyndaı almaýynyń sebebin atady.
«Kóńildi de, qarjyny da jetkilikti deńgeıde bólip, álemge myqty aqparat tarata alatyn jýrnalıstredi qalyptastyrýymyz kerek», dedi Erbolat Muhamedjanov.
Qazaqstandaǵy Euronews ókili Ásel Qojaqova da óz prezentasııasyn usyndy.
Astana Media Week-2024 aptalyǵynyń birinshi kúninde odan ári «Medıanyń ReNovasııasy (jańarý): zań, qaýipsizdik jáne transformasııa»», «Medıa trendter: klassıkalyq platformadan sıfrlyq medıa-ekojúıege deıin», «Interaktıv: Kúızelis: jýrnalıster úshin psıhologııalyq tájirıbe jıyntyǵy», «Tolassyz aqparat aımaqtyq BAQ jumysyn qalaı ózgertip jatyr? Medıaetıka jáne jýrnalıst mártebesi», Vızıonerlik leksııa «Superconnected:JI, sıfrlyq medıa jáne tehno-áleýmettik ómirdiń bolashaǵy» taqyryptarynda paneldik sessııalar ótedi.
Otandyq jáne sheteldik jetekshi medıamenedjerler, memlekettik qurylymdardyń ókilderi, aqparattyq platformalardyń basshylary jáne táýelsiz sarapshylar tájirıbe almasyp, túrli talqylaýlar ótkizedi.
Sondaı-aq aptalyqtyń birinshi kúni Selfie Travel halyqaralyq týroperatorynyń Kambodjaǵa týrıstik sapary utys oıyny jeńimpazyn jarııalaýmen aıaqtalady.
Esterińizge sala keteıik, medıaaptalyq 25-27 qyrkúıek aralyǵynda Qazmedıa ortalyǵynda ótedi.