ASTANA. 28 sáýir. Búgin Ortalyq saılaý komıssııasynyń otyrysynda osy jyldyń 26 sáýirinde ótken Qazaqstan Prezıdenti saılaýynda Nursultan Nazarbaevtyń jeńimpaz atanǵany resmı túrde jarııalandy. Saılaýshylardyń 97,75 paıyzy Nazarbaevtyń kandıdatýrasyn jaqtap daýys bergen. Bul týraly otyrysta Ortalyq saılaý komıssııasynyń tóraǵasy Qýandyq Turǵanqulov habarlady.
«Saılaýda barlyq daýys berýshilerdiń 95,21 paıyzy óz tańdaýyn jasady. Olardyń daýystary tómendegideı bólindi: Ábilǵazy Qusaıynovqa – 57 718 nemese 0,64%, Nursultan Nazarbaevqa – 8 833 250 nemese 97,75%, Turǵyn Syzdyqovqa – 145 765 nemese 1,61% saılaýshy daýys bergen. Oblystardan jáne Almaty men Astana qalalarynan alynǵan nátıjeler negizinde Ortalyq saılaý komıssııasy Nursultan Ábishuly Nazarbaev Qazaqstan Prezıdenti bolyp sanalsyn dep qaýly etedi», – dedi Qýandyq Turǵanqulov.
Buǵan deıin Ortalyq saılaý komıssııasy daýys berýdiń aldyn ala nátıjelerin jarııalaǵany belgili. Qýandyq Turǵanqulovtyń aıtýynsha, ol kezdegi nátıje tómendegideı bolǵan edi. Iаǵnı, Ábilǵazy Qusaıynovqa – 0,7%, Nursultan Nazarbaevqa – 97,7%, al Turǵyn Syzdyqovqa – 1,6% saılaýshylar daýys bergen.
Aıta keteıik, saılaýdan keıin birden exit poll-dyń nátıjesi jarııalandy. Ol kezde de Memleket basshysynyń saılaýda aıqyn basymdyqpen jeńiske jetkeni belgili bolǵan edi.
Elaman Qońyr.
Derek: Ortalyq saılaý komıssııasy.
Sýret: mail.ru.