Máslıhat depýtattarynyń forýmy sheńberinde «Infraqurylymdyq damý jáne ónerkásip» taqyrybynda arnaıy sessııa ótti, dep habarlaıdy Egemen.kz.
Astanada «AMANAT» partııasynyń uıymdastyrýymen barlyq deńgeıdegi máslıhattar depýtattarynyń forýmy ótti. Forým aıasynda ótken paneldik sessııalardyń biri «Infraqurylymdyq damý jáne ónerkásip» taqyrybyna arnalyp, oǵan Premer-mınıstriniń orynbasary Qanat Bozymbaev, О́nerkásip jáne qurylys mınıstri Qanat Sharlapaev pen Kólik mınıstri Marat Qarabaev qatysty.
Is-sharanyń maqsaty – turǵyn úı-kommýnaldyq sharýashylyq, qurylys, ónerkásip jáne kólik salalaryn jaqsartýdyń naqty joldaryn izdeý.
Paneldik sessııany QR Úkimet basshysynyń orynbasary Q.Bozymbaev ashyp, jınalǵandardyń aldynda elimizdiń óńirlerinde ınfraqurylymdy damytý jónindegi jumys josparymen tanystyrdy.
Elimizdiń túkpir-túkpirinen kelgen máslıhat depýtattary Úkimet ókilderine belsendi túrde halyqty mazalap otyrǵan suraqtaryn qoıyp, olardy sheshý jolyndaǵy óz usynystaryn bildirdi.
Suraqtardyń biri Jambyl oblysyndaǵy qant zaýytynyń jumysyn jalǵastyrýǵa qatysty boldy. Buǵan mınıstr qazirgi kezdegi basty mindet qant óńdeý zaýytyn jańǵyrtý dep jaýap berdi. Atap aıtqanda, elimizdegi shıkizattyń jetkilikti kólemin eskere otyryp, jańǵyrtýǵa ınvestısııa salýǵa múmkindik beredi.
«О́z óndirisimiz bola tura, osyndaı mańyzdy áleýmettik ónim boıynsha basqa elderge táýeldi bolý – múldem durys emes», dedi Q.Sharlapaev.
Odan basqa máslıhat depýtattary qurylys salasyna, otandyq taýarlar óndirýshileriniń jaýapkershiligi jáne basqa da birqatar ótinishterin jetkizdi. Barlyq suraqqa egjeı-tegjeıli jaýap berildi.