Jas urpaqqa aıtary kóp, ómiri ónegeli aǵa býyn búgingi referendýmda belsindilik tanytyp, úlgi kórsetip jatyr. Mysaly, Qazyǵurt aýdandyq «Ájeler alqasy» qoǵamdyq uıymynyń músheleri, aýdannyń aq jaýlyqty ájeleri referendýmda alǵashqylardyń biri bolyp óz tańdaýyn jasady.
«Ájeler alqasy» uıymynyń múshesi, Qazyǵurt aýdanynyń «Qurmetti azamaty» Qatıra Bekmuratova aýyldastaryn el bolashaǵy úshin mańyzy joǵary referendýmda tańdaý jasaýǵa shaqyrdy.
Jalpy Túrkistan oblysynda 1 mln 180 myńnan astam daýys berýshi bar. Ortalyq referendým komıssııasynan 13 respýblıkalyq qoǵamdyq birlestik, oblystyq aýmaqtyq referendým komıssııasynan 32 qoǵamdyq birlestik akkredıtasııadan ótken. Barlyq 945 referendým ýchaskesinde 6 433 baıqaýshy men 20 mobıldi kapıtan, sondaı-aq, 167 aýyldyq eldi mekende turǵyndardy tekserý úshin jyljymaly medısınalyq pýnktter jumys istep jatyr. Daýys berýge alǵashqy kelgenderge arnaıy syılyqtar tabys etilip jatyr. Oblys boıynsha qoǵamdyq kólikter tegin qatynaıdy. Kólik demekshi, barlyq aýdandarda «ınvataksı», áleýmettik taksıler qajetti jaǵdaıda kómek kórsetýge daıyn.
Mysaly, Maqtaaral aýdanynda múgedektigi bar azamattarǵa jaǵdaı jasaý úshin 61 saılaý ýchaskeleri arnaıy kabınalarmen, taktıldik kórsetkishtermen, arnaıy buryshtarmen, monıtorly kompıýtermen, ulǵaıtqyshtarmen, tutqalarmen jáne pandýstarmen tolyq jabdyqtalǵan. Sonymen birge 11 sýrdo-tıflo aýdarmashy, 3 ınvataksı tasymaldaý qyzmetimen, 4 áleýmettik taksılerimen qamtamasyz etilgen. Aýdandaǵy múgedektigi bar, kózi kórmeıtin zaǵıp azamattar úshin barlyq referendým ýchaskesine baǵyttaýshy taktıldi jolaq ornatylǵan. Sondaı-aq ınteraktıvti qoljetimdi kartasyna múgedektigi bar azamattarǵa yńǵaıly jerler kórsetilgen aqparattary bar elektrondy kartaǵa referendým ýchaskesi tolyq engizilgen.
Túrkistan oblysy