О́tken túnde AES qurylysyna qatysty respýblıkalyq referendýmnyń exit-poll nátıjeleri belgili boldy. Mundaı zertteýdi birneshe ınstıtýt qatar júrgizgen. Biraq olardyń barlyǵynyń usynǵan nátıjeleri azdaǵan paıyz aıyrmashylyǵy bolǵanymen, negizinen uqsas.
«SOSIS-A»: 69,8% daýys qoldaý tapty
Ortalyq kommýnıkasııalar qyzmetinde ótken brıfıngte «Astana – keshendi áleýmettik zertteýler ınstıtýty» («SOSIS-A») jeke qory júrgizgen exit-poll nátıjeleri jarııalandy.
Atalǵan ınstıtýttyń taldaýshysy Álibek Tájibaevtyń aıtýynsha, «Astana – keshendi áleýmettik zertteýler ınstıtýty» jeke qory «Habar» agenttigi» AQ tapsyrysymen 2024 jyldyń 6 qazanynda daýys berý ýchaskelerinen shyǵa beriste exit-poll ádistemesi negizinde azamattardyń erik bildirý nátıjeleriniń aldyn ala esebin júrgizdi.
Ol «Úzdiksiz aǵyn» ádistemesiniń kómegimen elimizdiń 189 ýchaskesinde daýys bergen 283 519 azamat qamtylǵanyn aıtty. Olardan referendým aıasynda qoıylǵan «Siz Qazaqstanda atom elektr stansasyn salýǵa kelisesiz be?» degen suraqqa qalaı jaýap bergeni suraldy.
«Exit-poll qorytyndysy mynadaı: saýalnamaǵa qatysqan azamattardyń 69,8%-y AES qurylysyn qoldap daýys bergenin málimdedi. Saýalnamaǵa qatysýshylardyń 30,2%-y ózderiniń kelispeıtinin aıtqan. Ýchaskelerge kelý kórsetkishi 67,3% deńgeıinde tirkeldi. Derekterdiń qateligi ± 1,5% quraıdy», dedi Á.Tájibaev.
EII: 71,8% daýys – «ıá»
Eýrazııalyq ıntegrasııa ınstıtýty Zakon.kz aqparattyq portalynyń tapsyrysymen AES qurylysy boıynsha referendýmda exit-poll saýalnamasyn júrgizdi. Bul nátıjeni ınstıtýt ókili Áıgerim Esenbolatqyzy málim etti.
Onyń aıtýynsha, «Saılaý týraly» jáne «Respýblıkalyq referendým týraly» zańdar talabyna sáıkes ınstıtýt Referendýmnyń ortalyq komıssııasyn exit-poll ótkizetini týraly aldyn ala qulaqtandyrǵan. Atalǵan saýalnama elimizdiń 17 oblysy men Astana, Almaty, Shymkent qalalarynda 250 ýchaskede júrgizildi. Onyń ishinde 159-y – qalalarda, 91-i aýyldarda arnaıy daıyndalǵan suhbatshynyń kómegimen face-to-face, ıaǵnı betpe-bet ádisimen ótken. Zertteý nátıjesiniń qateligi 1 paıyzdan aspaıdy.
Tańǵy saǵat 7.00-den keshki 20.00-ge deıin júrgizilgen saýalnama nátıjesinde «Siz Qazaqstanda atom elektr stansasyn salýǵa kelisesiz be?» degen suraqqa daýys berýshilerdiń 71,8 paıyzy «Iá, kelisemin» dep jaýap berdi. Al 28,2 paıyzy «Joq, kelispeımin» degen jaýapty tańdaǵanyn málimdedi.
Instıtýt mamandary exit-poll saýalnamasyna qatysqan árbir daýys berýshi aty-jóniniń qupııalyǵy qatań saqtalatynyn aıtady.