QR Premer-Mınıstriniń birinshi orynbasary Roman Sklıar Úkimet otyrysynyń qorytyndysy boıynsha ótken baspasóz konferensııasynda Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda qoıylǵan mindetter sheńberinde energetıkalyq jáne kommýnaldyq ınfraqurylymdardy jańǵyrtý boıynsha júrgizilip jatqan jumystar týraly habarlady, dep jazady Egemen.kz.
Úkimet jylý jelileriniń tozý kórsetkishin azaıtý boıynsha aýqymdy jumystar júrgizip jatyr.
Eske sala keteıik, ótken jyldan bastap Qazaqstanda «Tarıfti ınvestısııaǵa aıyrbastaý» baǵdarlamasy júzege asyrylyp keledi. Osynyń esebinen jylý jáne energııa kózderindegi jóndeý jumystaryn qarjylandyrýdyń jalpy kólemi 2023 jyly tarıhtaǵy eń iri kólemge – 227 mlrd teńgege jetken. Al, bıyl rekordtyq 327 mlrd teńgege deıin ósken.
2020-2022 jyldary atalǵan jumysty qarjylandyrý kólemi jylyna orta eseppen 90 mlrd teńgeden aspaǵan.
«2019 jyly barlyq jylý jelileriniń tozýy elimiz boıynsha ortasha eseppen 61%-dy qurady, jyl sońyna deıin biz bul kórsetkishti 52%-ǵa deıin jetkizemiz», dep atap ótti Roman Sklıar.