Premer-mınıstr Oljas Bektenov Úkimet otyrysynda Saran qalasyndaǵy jaǵdaıǵa qatysty pikir bildirdi, dep habarlaıdy Egemen.kz.
Úkimet otyrysynda Saran qalasyndaǵy jylý berý maýsymynyń bastalýy týraly másele kún tártibinen tys qaralǵan. Qaraǵandy oblysynyń ákimi Ermaǵanbet Bólekpaev aǵymdaǵy jaǵdaı men atqarylyp jatqan jumystar týraly aıtty.
«Qazir qazandyq iske qosyldy. 13 qazanda avtomatıkanyń aqaýlyǵyna baılanysty qazandyqtyń jumysy toqtatyldy. Rezervtik qazandyqty qosý týraly sheshim qabyldandy. Búgingi tańda jumys júrgizilip jatyr, másele meniń jeke baqylaýymda», dedi Bólekpaev.
Úkimet basshysy ákimge qalǵan barlyq jumystardy búgin aıaqtaýdy tapsyrǵan.
«Búgin bárin aıaqtaý qajet. Birinshi kezekte, bul – Saran qalasy ákiminiń jeke jaýapkershiligi jáne oblys ákimdigi tarapynan tıisti baqylaýdyń joqtyǵy. Meniń tapsyrmam boıynsha qazir tekseris júrip jatyr. Jylý beretin nysannyń daıyndyǵy týraly jalǵan aqparat bergen adamdardardyń barlyǵy jaýapkershilikke tartylady», dedi Oljas Bektenov.
Premer-mınıstr Úkimet otyrysynan keıin Energetıka mınıstriniń Saran qalasyna baratynyn málim etti.
«Osy otyrystan keıin energetıka mınıstri Saran qalasyna baryp, ózi bárin tekseredi. Tekserý nátıjesi boıynsha materıaldardy quqyq qorǵaý organdaryna jiberemiz. Eger qylmystyń quramy bar bolatyn bolsa, kináli adamdardyń bári qylmystyq jaýapkershilikke tartylady», dedi Úkimet basshysy.
Eske salaıyq, 13 qazanda Saran qalasynda jurt jylýsyz otyrǵany týraly aqparat tarady. Jergilikti turǵyndar úılerinde salqyn ekenin aıtyp shaǵymdandy. Ákim Erkin Baýlyqov qalada jylý joq ekenin rastap, jylý júıesi jańartylǵanyn, ortalyq júıeler arqyly jylý berilip jatqanyn alǵa tartqan.