2024 jyldyń 14 qazanynda Aqtaý turǵyny jedel járdemge qońyraý shalyp, densaýlyq jaǵdaıyna shaǵymdanǵan. Aqyry «naýqas» 80 myń teńge kóleminde aıyppul tóleýge májbúr boldy, dep habarlaıdy Egemen.kz.
Anyqtalǵandaı, jergilikti turǵyn arnaıy qyzmetke kóp kólemde dári-dármek qabyldaǵanyn aıtyp qońyraý shalǵan. Alaıda jedel járdem brıgadasy shaqyrtýǵa barǵanda, er adam munyń «prank» ekenin aıtqan. Mańǵystaý oblystyq jedel jáne shuǵyl medısınalyq kómek stansııasynyń baspasóz qyzmeti bul faktini rastady.
«Shaqyrtý jalǵan qońyraý esebinde tirkelip, Aqtaý qalasynyń turǵynyna QR Ákimshilik quqyq buzýshylyq týraly Kodeksiniń 438-baby boıynsha arnaýly qyzmetterdi kórineý jalǵan shaqyrtý boıynsha 80 000 teńge kóleminde aıyppul salyndy», delingen habarlamada.