QR Ádilet mınıstri Azamat Esqaraev 2001 jyly Ulybrıtanııanyń burynǵy premer-mınıstri Margaret Tetcherge berilgen «Dostyq» ordeniniń satylymǵa shyǵarylǵanyna qatysty pikir bildirdi, dep habarlaıdy Egemen.kz.
«Bizdiń zańnamaǵa sáıkes memlekettik nagradalardy satýǵa jol berilmeıdi. Tıisti jaýapkershilik qylmystyq kodekste qarastyrylǵan. Al memlekettik nagradalardy satqan, saýdalaǵan adam jaýapqa tartylýy kerek. Ulybrıtanııa máselesine keletin bolsaq, birinshiden, Margaret Tetcherdiń aty ańyzǵa aınalǵan tulǵa ekenin eskerý qajet. Tarıhta belgili bir ról atqarǵan mundaı tulǵalardyń jeke zattary, kitaphanasy, marapattary aýksıonǵa merzimdi túrde qoıylýy múmkin – bul olardyń mádenıetiniń bir bóligi», dedi Esqaraev.
Mınıstr jaýapkershilikke tartý máselesi bul basqa da ýákiletti organdardyń – Syrtqy ister mınıstrliginiń nemese Mádenıet mınıstrliginiń quzyretine jatatynyn atap ótti.
Aıta keteıik, 2001 jyly Ulybrıtanııanyń burynǵy premer-mınıstri Margaret Tetcherge berilgen Qazaqstannyń «Dostyq» ordeni shamamen 8 mıllıon teńgege satylymǵa qoıylǵan. Jarnama brıtandyq antıkvarıat Pıter Harrıngton saıtynda paıda bolǵan.