Túrkistan qalasynda 600 oryndyq mektep paıdalanýǵa berildi. Buǵan deıin Baıanaýyl eldi mekeninde mektep bolmaǵandyqtan, osy aýmaqtaǵy oqýshylar №17, №21, №27 mektepterge qatynap oqıtyn. Endi ol másele sheshimin tapty.
Oblys ortalyǵyndaǵy bilim uıasynyń qurylysy 2023 jyly bastalǵan edi. Jańa mektepke joǵaryda atalǵan bilim uıalarynan ustazdar men oqýshylar aýysady. Sonymen qatar kórshi aýyldardaǵy ata-analar da balalaryn osy mektepke oqytýǵa nıetti. Shaǵyn aýdan turǵyndarynyń basym bóligi – kópbalaly otbasylar. Oqýshylarǵa esigin aıqara ashqan jańa №35 jalpy orta mektebinde bilim alýǵa tolyq jaǵdaı jasalǵan.
«Búgin turǵyndardyń ótinishteri oryndalyp, Túrkistan qalasynda jańa mektep ashyldy. Endi osynda bilim alatyn balalarymyz eldiń myqty azamattaryna aınalyp, memleketti damytýǵa úles qosady dep senemin», dedi oblys ákimi Darhan Satybaldy ashylý saltanatynda.
Jalpy, Túrkistan qalasynda 4 mekteptiń qurylysy júrgizildi. Osyǵan deıin «Jaıly mektep» jobasy aıasynda salynǵan mekteptiń qurylysy aıaqtalyp, paıdalanýǵa berilgen edi. Taǵy 2 mekteptiń qurylysy aıaqtalýǵa jaqyn.
Saryaǵash aýdanynda úsh birdeı jańa medısınalyq nysan ashyldy. Jańaturmys eldi mekenindegi táýligine 25 turǵyndy qabyldaı alatyn medısınalyq alǵashqy kómek kórsetetin dárigerlik ambýlatorııa aýyl turǵyndarynyń ıgiligine tabystaldy. Sondaı-aq Jemisti eldi mekenindegi zamanaýı úlgidegi dárigerlik ambýlatorııanyń ashylý saltanaty bolyp ótti. Dál osy úlgidegi ambýlatorııa Jemisti aýyldyq okrýgi Tyń eldi mekeninde de ashyldy. Medısınalyq nysandardyń qurylys jumysy «Aýyl – el besigi» baǵdarlamasy aıasynda júrgizildi. Zamanaýı aspaptarmen jabdyqtalǵan dárigerlik ambýlatorııalarda tis dárigeri, zerthanalyq kabınetter de qarastyrylǵan.
Sondaı-aq aýdanǵa qarasty Darbaza eldi mekeninde 500 balaǵa arnalǵan zamanaýı sport kesheni de iske qosyldy. Jańa sport nysanynda fýtbol alańshasy, boks, sambo, dzıýdo, ústel tennısi, qazaq kúresi, taekvondo, fýtbol, shahmat úıirmelerine arnalǵan zaldar bar.
Jalpy, oblysta áleýmettik mańyzy bar jańa 10 nysan ashyldy. Maqtaaral aýdanyndaǵy О́rkenıet eldi mekeninde shaǵyn sport kesheni, Saýran aýdanyndaǵy Orańǵaı aýylynda №6 arnaýly áleýmettik qyzmetter kórsetý ortalyǵy, Keles aýdanyndaǵy Jıdeli aýylynda 75 oryndyq aýyldyq klýb úıi paıdalanýǵa berildi.
Túrkistan oblysy