Bul týraly Májilis depýtaty Ashat Aımaǵambetov Telegram paraqshasynda jazdy, dep habarlaıdy Egemen.kz.
Onyń aıtýynsha, onkologııalyq naýqastardy emdeýdi qarjylandyrý úshin qosymsha qarajat bólingen.
«Bıýdjet jobasynda onkologııany emdeýge bólinetin qarjyny 20 mıllıard teńgege, al onkogematologııany 5 mıllıard teńgege qysqartý týraly usynys boldy. Alaıda, biz bul qysqartýǵa qatań túrde qarsylyq bildirip, qosymsha qarajat bólý týraly túzetý engizdik. Densaýlyq saqtaý mınıstrligimen birlesken jemisti jumysymyzdyń arqasynda onkologııalyq naýqastardy emdeýdi qarjylandyrý úshin qosymsha 25 mıllıard teńge bólý týraly túzetýimiz qoldaý tapty. Bul – óte qýanyshty jáne mańyzdy jańalyq», dep jazdy Ashat Aımaǵambetov.
Sonymen qatar, Aımaǵambetov sońǵy jyldary onkologııaǵa qarsy kúreste Prezıdenttiń qoldaýynyń arqasynda aıtarlyqtaı jetistikterge qol jetkizilgenin tilge tıek etti. Sondaı-aq, keshendi jospar bekitilgenin jáne mamandandyrylǵan ortalyqtyń qurylysy aıaqtalýǵa jaqyn ekenin atap ótti.
«Sonymen qatar, Ulttyq onkologııa ortalyǵyndaǵy protondyq terapııa ortalyǵynyń qurylysyn aıaqtaýǵa 4,2 mıllıard teńge bólý týraly usynysymyz da qabyldandy.Qazirgi ýaqytta Ortalyq Azııada protondyq terapııa ortalyǵy joq, sondyqtan bizdiń pasıentter qymbat em alý úshin shetelge barýǵa májbúr. Qazaqstanda bul ortalyq jyl saıyn 300-den astam naýqasqa ómir súrýge múmkindik berip, shetelde emdelýge qajetti úlken shyǵyndardan bosatady», delingen jazbada.