«AMANAT» partııasy fraksııasynyń múshesi, Parlament májilisiniń halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan tómengi palatanyń jalpy otyrysynda «Qazaqstan Respýblıkasynyń keıbir zańnamalyq aktilerine áskerı-patrıottyq tárbıe máseleleri boıynsha tolyqtyrýlar engizý týraly» Qazaqstan Respýblıkasy zańynyń jobasy jóninde baıandama jasady, dep habarlaıdy Egemen.kz.
«О́zderińizge belgili, Memleket basshysy Qasym-Jomart Kemeluly Toqaev 2022 jylǵy 11 qańtardaǵy Qazaqstan Respýblıkasy Parlamenti Májilisiniń otyrysynda sóılegen sózinde: «Kóptegen jas azamattarymyz Qarýly kúshter qatarynda áskerı boryshyn óteýden qashady. Áskerı bıletke ıe bolý jastardyń maqtanyshyn týdyrmaıdy jáne Otanǵa qyzmet etýdiń belgisi sanalmaıtyn boldy» dep aıtqan. Sondyqtan El Prezıdenti osy máselege basa nazar aýdaryp: «Jastarymyzdy áskerı boryshyn óteýge qalaı yntalandyrýǵa bolatynyn biz búkil qoǵam bolyp oılastyrýymyz kerek» dep basyp aıtqan. Áıgili jazýshy Muhtar Áýezovtiń «El bolam deseń, besigińdi túze» degen tereń de mándi naqyly bar. Sondyqtan Otandy súıý, Otanǵa qyzmet etýdi bala kezden úıretý kerek. Alaıda, búgingi kúni elimizde balalar men jastardyń patrıottyq tárbıesi, ıaǵnı Otanǵa adal qyzmet etý, azamattyq borysh pen negizgi konstıtýsııalyq mindetterdi oryndaý zaman talaptaryna saı kelmeıdi», dedi Aıgúl Quspan.
Onyń aıtýynsha, jaýapty ýákiletti organdardyń ózara is-qımyly formaldy sıpatqa tán. Atqarylyp otyrǵan jumystary azamattardyń boıynda patrıottyq sanany berik qalyptastyrmaıdy.
«2022 jyly Úkimetke azamattardy áskerı-patrıottyq tárbıeleý tártibin aıqyndaý quqyǵy berilgen bolatyn. Sol jyly-aq tıisti erejeler qabyldandy, biraq bul is-áreket qalyptasqan jaǵdaıdy ózgertpedi. Osylardy eskere otyryp, biz, Parlamenttiń bir top depýtattary elimizdegi áskerı-patrıottyq tárbıeni jetildirýge baǵyttalǵan zań jobasyn ázirledik. Zań jobasy «Áskerı qyzmet týraly» Zańyn «áskerı-patrıottyq tárbıe», «áskerı-patrıottyq tárbıe júıesi» termınderiniń mazmunyn zańnamalyq turǵydan aıqyndaıtyn jańa bappen tolyqtyrady», dedi «AMANAT» partııasy fraksııasynyń múshesi Aıgúl Quspan.
Sonymen qatar, osy norma respýblıkalyq jáne óńirlik deńgeılerde Áskerı-patrıottyq tárbıe jónindegi úılestirý keńesterin qurýdy kózdeıdi.
Aıgúl Quspannyń aıtýynsha, keńesterdiń negizgi mindetteri tómendegideı:
- áskerı-patrıottyq tárbıeni damytý máseleleri boıynsha usynystar ázirleý;
- baǵdarlamalyq is-sharalardy uıymdastyrý barysynda azamattardy áskerı-patrıottyq tárbıeleýde barlyq múddeli memlekettik organdar men uıymdardyń jáne qoǵamdyq birlestikterdiń kúsh-jigeri men múmkindikterin biriktirý;
- jastardyń boıynda Qazaqstan armııasynyń jaǵymdy beınesin qalyptastyrý úshin kórkem jáne derekti fılmder jasaý, mýzyka jáne ádebı shyǵarmalar týdyrý, baspa ónimderin shyǵarý, telearnalarda áskerler týraly sıkldy habarlar júrgizý jáne áleýmettik jelilerde shynaıy aqparat berý.
Áskerı-patrıottyq tárbıe máselelerinde úılestirilgen jáne kelisilgen jumysty is júzinde júzege asyrý úshin «Qorǵanys jáne Qarýly Kúshter týraly» Zańynda kózdelgen ortalyq jáne jergilikti atqarýshy organdardyń fýnksııalaryna tıisti tolyqtyrýlar engizý usynylady.
«Sondaı-aq, «Memlekettik jastar saıasaty týraly» Zańyna mádenıet salasyndaǵy ýákiletti organnyń jastar uıymdarymen áskerı-patrıottyq tárbıe máseleleri boıynsha ózara is-qımyly men yntymaqtastyǵyn júzege asyrý bóliginde tolyqtyrý engiziledi. Zań jobasyn qaraý barysynda depýtattar áskerı-patrıottyq tárbıeni jetildirýge, áskerı qyzmettiń bedeli men tartymdylyǵyn arttyrýǵa baǵyttalǵan birqatar túzetýlerdi usyndy.
Osyǵan baılanysty zań jobasy mazmundyq jáne tujyrymdamalyq jaǵynan birshama jaqsardy. Osy úshin ázirleýshiler atynan jumys tobynyń múshelerine jáne qatysty depýtattarǵa alǵys bildirgim keledi.
Qurmetti áriptester, Memleket basshysy 2023 jyly ótken Búkilarmııalyq keńeste jastarymyzdy otanshyldyqqa tárbıeleýdiń qajet ekenin aıtqany barshamyzdyń esimizde.
Usynylyp jatqan zań jobasy óskeleń urpaqty Otanymyzdyń naǵyz janashyryna aınaldyrýǵa, olardyń áskerı-patrıottyq rýhyn arttyrýǵa áser etetini sózsiz. Osyǵan baılanysty ony qoldaýlaryńyzdy suraımyn», dep qorytyndylady baıandamasyn.