Bıyl Qazaqstan qor bırjasy (KASE) kórsetkishteri men saýda belsendiligine qatysty birneshe mańyzdy ózgeris boldy. Qyrkúıek aıynda KASE ındeksi 2,5%-ǵa tómendep, 5 171,79 tarmaqqa deıin jetti. Buǵan «Kaspi.kz» AQ aksııalary baǵasynyń 14,8%-ǵa túsýi sebep.
О́zgeristerdiń kóptiginen aksııalar naryǵynyń kapıtaldanýy 4,5%-ǵa, ıaǵnı 1,5 trln teńgege azaıyp, 31,5 trln teńgeni qurady. Aksııalarmen saýda-sattyq kólemi ótken aımen salystyrǵanda 19,0%-ǵa artyp, 10,8 mlrd teńgege jetti. Jalpy alǵanda, saýda-sattyq kóleminiń ósýi negizinen «KEGOC» AQ, «QazTransOıl» AQ, «Baıan Sulý» AQ aksııalarymen baılanysty. Al korporatıvtik oblıgasııalardyń saýda-sattyq kólemi bıyl qyrkúıekte 0,1%-ǵa azaıyp, 14,2 trln teńgege jetti. Bul tómendeý negizinen korporatıvtik oblıgasııalardyń bastapqy naryǵyndaǵy saýda-sattyq kóleminiń tómendeýinen boldy. Sebebi saýda-sattyq kólemi qaıtalama naryqta 50,9%-ǵa tómendegen.
Memlekettik baǵaly qaǵazdar men saýda-sattyq kólemi 0,8%-ǵa ósti. Oǵan memlekettik oblıgasııalardyń satylýy men saýda kóleminiń ulǵaıýy áser etti. Bıyl 1 qazandaǵy jaǵdaıda ınvestısııalyq paı naryǵyndaǵy basqarýdaǵy aktıvter 0,1%-ǵa azaıyp, 297,7 mlrd teńgege deıin tómendedi. Baǵaly qaǵazdar naryǵynyń kásibı qatysýshylarynyń aktıvteri 0,7%-ǵa, ıakı 4,9 mlrd teńgege artyp, 742,1 mlrd teńgege jetti. Bul ózgeris negizinen boryshtyq ınvestısııalardyń ári zańdy tulǵalarǵa jasalǵan kapıtal salymdarynyń artýymen baılanysty.
KASE ındeksi men qarjy naryqtary bıyl túrli faktordyń áserinen ózgeristerge ushyrady. Aksııalar men oblıgasııalardyń saýda kólemi birqatar emıtentpen baılanysty ulǵaısa da, keıbir aksııalar, ásirese «Kaspi.kz» aksııalarynyń tómendeýi jalpy naryq kapıtaldanýyna áser etti.
1 qazandaǵy ahýalda KASE saýda tizimderinde 85 otandyq emıtenttiń 100 ataýynyń aksııasy bar-tuǵyn. Onyń ishinde 2 emıtenttiń 2 ataýynyń aksııalary «Lıstıngtik emes baǵaly qaǵazdar» sektorynda aınalysqa jiberildi. «KASE Global» sektorynda 46 túrli aksııa, 55 sheteldik emıtentten 12 ETF boldy. «KASE Global» sektoryndaǵy saýda-sattyq kólemi negizinen «Microsoft Corporation», «Apple Inc», «Advanced Micro Devices» aksııalarynyń saýda-sattyq kóleminiń tómendeýi esebinen bir aıda 17,0%-ǵa, ıakı 0,5 mlrd teńgege azaıdy. Sonda jalpy somasy 2,4 mlrd teńge boldy.
KASE-de memlekettik baǵaly qaǵazdarmen saýda-sattyqtyń jıyntyq kólemi bastapqy naryqtaǵy saýda-sattyq kóleminiń qysqarýy nátıjesinde bir aıda 14,8%-ǵa nemese 440,6 mlrd teńgege azaıyp, 2024 jylǵy qyrkúıek aıynyń qorytyndysynda 0,5 trln teńgeni qurady.
Memlekettik baǵaly qaǵazdar bastapqy naryǵyndaǵy saýda-sattyq kólemi 33,1%-ǵa tómendedi. Onyń ishinde Qarjy mınıstrligi 7 oblıgasııalar shyǵarylymyn ornalastyryp, óteýge tabystylyǵy 13,16-13,43%-dy quraıtyn 203,1 mlrd teńgeni tartty. 11 oblystyń jáne Almaty, Shymkent qalalarynyń ákimdikteri memlekettik baǵdarlamalardy iske asyrý sheńberinde 54,0 mlrd teńge tartty.