Atyraý oblysynda sport salasynda 900 mıllıon teńgeden astam qarjy buzýshylyqtary anyqtalǵan. Sondaı-aq 30 jattyqtyrýshy jalǵan dıplommen jumys istegen, dep habarlaıdy Egemen.kz.
Sybaılas jemqorlyqqa qarsy is-qımyl agenttiginiń Atyraý oblysy boıynsha departamentiniń basshysy Erulan Serikqalıevtiń aıtýynsha, dene shynyqtyrý, sport jáne týrızm basqarmasynda sybaılas jemqorlyq táýekelderine taldaý júrgizilgen.
«Saraptama qorytyndysy boıynsha 900 mıllıon teńgeden astam qarjy buzýshylyqtary anyqtalyp, bir qylmystyq is qozǵaldy. 4 mıllıon teńge bıýdjetke qaıtaryldy. Jalǵan dıplommen jumysqa ornalasqan 30 jattyqtyrýshy qyzmetinen bosatyldy. Jeke tulǵaǵa negizsiz berilgen Muz saraıynyń ǵımaraty kommýnaldyq menshikke qaıtaryldy. Sondaı-aq senimgerlik basqarý sharttaryna sáıkes mindettemeleri oryndalmaǵan basqa sport nysandaryn kommýnaldyq menshikke qaıtarý jumystary júrgizilip jatyr», dedi Erulan Serikqalıev.
Sonymen qatar medısınalyq mekeme basshylary men bas esepshiler jalaqylaryn jasandy túrde kótergen.
«Densaýlyq saqtaý salasyndaǵy sybaılas jemqorlyq táýekelderin taldaý barysynda medısınalyq mekeme basshylarynyń eńbekaqy tóleý qarajatyn oqý aqysyn tóleýge paıdalaný jaǵdaılary anyqtaldy. Mysaly,№5 emhana dırektory «Esil» ýnıversıtetinde oqýǵa 2,1 mıllıon teńge, Geolog aýylyndaǵy emhana dırektory 2,6 mıllıon teńge, Atyraý oblystyq psıhıkalyq densaýlyq ortalyǵynyń dırektory 3,2 mıllıon teńge, Maqat aýdandyq aýrýhanasynyń dırektory – 2,6 mln teńge, №3 emhana dırektory – 2 mln teńge. Bul qarajattyń barlyǵy bıýdjetke qaıtaryldy», dep habarlady vedomstvonyń baspasóz qyzmeti.