Senat Spıkeri Máýlen Áshimbaevtyń tóraǵalyǵymen Palata otyrysy ótti. Onda senatorlar Qazaqstan men Qatar arasyndaǵy áskerı yntymaqtastyq týraly zańdy qarady jáne ózderiniń depýtattyq saýaldaryn joldady, dep habarlaıdy Egemen.kz.
Palata otyrysynda depýtattar «Qazaqstan Respýblıkasynyń Úkimeti men Qatar Memleketiniń Úkimeti arasyndaǵy áskerı yntymaqtastyq týraly kelisimdi ratıfıkasııalaý týraly» zańdy qarady.
Bul qujattyń normalary áskerı bilim berý jáne áskerı qyzmetshilerdi daıarlaý, áskerı medısına, áskerı ǵylym, mádenı jáne sporttyq is-sharalar, beıbitshilikti qoldaý jónindegi operasııalarǵa, jaýyngerlik daıarlyqqa jáne ózge de salalarǵa baılanysty máseleler boıynsha konsýltasııalar salasyndaǵy yntymaqtastyqty damytýǵa jáne nyǵaıtýǵa baǵyttalǵan.
Sonymen qatar Kelisim áskerı yntymaqtastyq salasy men nysandaryn aıqyndaýdy, taraptardyń áskerı yntymaqtastyǵyn úılestirý jónindegi ózara is-qımyl tetigin belgileýdi, áskerı múlik tranzıti, materıaldyq-tehnıkalyq qamtamasyz etý jáne qarjylandyrý, áýe keńistigi men áskerı polıgondardy paıdalaný, tildik daıarlyqty júrgizý máselelerin retteýdi kózdeıdi.
Aıta keteıik, atalǵan zań aıasynda ýákiletti organdar taraptardyń qyzmetin aıqyndaýǵa, uıymdastyrýǵa jáne úılestirýge ýákilettik berilgen ókilderden turatyn birlesken jumys tobyn qurady.
«Kelisim aıasynda Qatar memleketimen áskerı saladaǵy yntymaqtastyqty arttyrýǵa arnalǵan birlesken sharalar qarastyryldy. Bul sharalar eki eldiń qaýipsizdigin kúsheıtýge arnalyp otyr. Maquldanǵan zań aldaǵy ýaqytta memleketterimiz arasyndaǵy seriktestikti nyǵaıtýǵa jáne aýmaqtarymyzdyń turaqtylyǵy pen qaýipsizdigin qamtamasyz etýge óz septigin tıgizedi dep senemiz», dedi Máýlen Áshimbaev.
Kelisim bes jyl merzimge jasaldy jáne kelesi besjyldyqqa avtomatty túrde uzartylady. Eger taraptardyń biri uzartý sharttarymen kelispese, onda ol aǵymdaǵy merzim aıaqtalǵanǵa deıin alty aıdan keshiktirmeı ekinshi tarapty habardar etýi qajet.