Kánigi qusbegiler «toq búrkit túlki almaıdy» deıtin qaǵıdany berik ustanyp, qusyna jem berý tásilin sheber meńgerýdiń arqasynda ańshylyq qura bilgen. Búrkittiń ańǵa túsýi men babynyń kelýi onyń jegen jemine, ıaǵnı tamaqtanýyna baılanysty. Jemi sáıkespese, búrkittiń kúıi kelmeıdi. Kúıi kelmegen búrkit ańǵa túspeıdi.
Búrkitti jemdeý degenimiz – ony semirtip, arytyp, ishin tazalap, etin qatyrý. Bul tásilder qusqa jemdi az nemese kóp berý arqyly júzege asyrylady. Búrkit negizinen etpen qorektenedi. Keıbir kezde qajettilikke baılanysty qusyna balyq bolmasa qustyń etin jegizetin búrkitshiler de bar.
Ańshylyq maýsymy toqtaǵan jaz mezgilinde túlep otyrǵan búrkitti tez semirtý maqsatynda maıly, qunarly, toq jem beredi. Al qaıyrý kezinde jemniń túrin ózgertip, maısyzyn, qunarsyzyn beredi. Sonar bastalǵan ańshylyq kezderi, ıaǵnı qys aılarynda búrkittiń babyna qatysty qunarly, qunarsyz ártúrli jem berip, baptaıdy. Iаkı, búrkit áljýazdana bastasa, maıly et berip qýattandyrady, al, qus tym toq bolsa, qunarsyz et berip, ashyqtyrady.
Búrkit jegen jemine saı baby qanyp, zaryna túsedi. Sondyqtan búrkitti jemdeý máselesi, qusbegiliktiń asa bir mańyzdy qyry sanalady. Tájirıbeli búrkitshiler qusyna «jyly jem» bergendi quptaıdy. Jyly jem dep jańadan ustaǵan qoıannyń etin aıtady. Sondyqtan baıyrǵy qusbegiler qolyndaǵy qusyna osy jemniń túrin turaqty berip otyrý úshin, qosymsha qarshyǵa, suńqar, lashyn sııaqty qoıanshyl qustardy qosyp asyraıtyn dástúr bar. Bul sháýli qustardy jas qusbegiler baptap ustap, qoıan aldyrady jáne bolashaq qusbegiliktiń ónerin úırenedi.
Búrkittiń jemine – qoı, sıyr, jylqynyń eti sapaly sanalady da, eshkiniń eti berilmeıdi. Dala ańdarynyń ishinen – sasyqkúzen men málinniń etin búrkitke jegizýge bolmaıdy. О́ıtkeni, bundaı etter qusty buzady. Túlekte otyrǵan búrkitke sýyrdyń etin bergendi qup kóredi. Eger qus túlemeı keshikse, oǵan semiz balyq jegizedi. Birneshe dúrkin toıyp balyq jegen qus júni keýip, tez túleıdi. Maldyń etin qusqa bergende búrkitshiler japyraqtap týrap beredi. Kóbinde maldyń san etin jegizedi. Eskirgen nemese aýyryp ólgen maldyń etin búrkitke berýge bolmaıdy.