Aqtóbe qalasynda dzıýdodan eresekter arasynda el chempıonaty máresine jetti. Keler jyldyń enshisindegi álemdik dodalarǵa baratyn balýandardy irikteý alamany bolǵandyqtan, bıylǵy birinshilikke qatysýshylardyń shoǵyry qalyń boldy. Tipti bir salmaq dárejesinde 50-den astam sańlaq synǵa tústi.
60 kg salmaqta bizde básekelestik óte joǵary. Bul joly 55 balýan júldege talasty. Kópshilik jastar arasynda álem chempıony, gran-prı, grand-slem saıystarynda olja salǵan Maǵjan Shamshadın, halyqaralyq dodalarǵa túsip, ysylǵan Nurqanat Serikbaev, jastar arasynda álem chempıonatynyń eki dúrkin júldegeri Talǵat Orynbasar syndy sańlaqtar top jarady dep sengen. Biraq birinshi aınalymda Nurqanat pen Talǵattyń joly túıisip, jastyq jigermen Talǵat basym tústi. Talǵat ekinshi aınalymda kútpegen jerden Danııar Qylyshevke ese jiberdi. Bul salmaqta fınalǵa qyzylordalyq Maǵjan Shamshadın men qostanaılyq Nurádil Áljan shyǵyp, qylǵyndyrý ádisimen Nurádil el chempıony atandy. Qola medaldi Aldııar Qarǵulov (Qaraǵandy oblysy), Nurgeldi Qanat (Mańǵystaý oblysy) enshiledi.
66 kg salmaq dárejesinde astanalyq Erjan Erenqaıypov fınalda qyzylordalyq Erdáýlet Bozjany jyǵyp, el chempıony atandy. Qola medal Baýyrjan Narbaev (Mańǵystaý oblysy), Mıras Jonysovqa (Aqtóbe oblysy) buıyrdy. Erjandy jankúıerler qazaq kúresiniń sheberi retinde de jaqsy tanıdy. Tól kúresten de baıraqty dodalarda top jarǵan balýan.
Jastar qarymdy ekenin 73 kg salmaqta da kórsetti. Parıj jazǵy Olımpıadasyna qatysýshy Danııar Shamshaevty irikteýde yǵystyrǵan Barys Qýan (Abaı oblysy) fınaldyq beldesýde Eset Qýanovqa (Aqtóbe oblysy) ese jiberip, kúmis medaldi mise tutty. Qola júldeni Saıat Seıitqalıev (BQO), Islam Toqtasyn (Almaty oblysy) ıelendi.
81 kg salmaq dárejesinde Mádı Amangeldi (Astana) fınaldyq tartysta qyzylordalyq Aıǵalı Qaldybekti jeńdi. Doshan Joljaqsynov (Jetisý oblysy), Azat Kúmisbaı (Mańǵystaý oblysy) qola júldeger atandy.
Bıylǵy chempıonatta da salmaq dárejesi aýyrlaǵan saıyn qatysýshylar sany kemip otyrdy. Mysaly, 90 kıloda 40 balýan tatamıge shyqty. Uzaq merzimdik úzilisten keıin sportqa qaıta oralǵan Dıdar Hamza (Túrkistan oblysy) óziniń baǵyn osy salmaqta synap kórýge bel býǵan edi. 19 jasynda Rıo jazǵy Olımpıadasyna qatysyp, 2021 jyly Tokıo Olımpıadasynda beldesken tájirıbeli balýannyń joly bolmady. Jerebe sátti túsip, saıysty ekinshi aınalymnan bastaǵan Dıdar jambyldyq Nuǵman Bıbarysty jyqqanymen, shırek fınalda Abaı oblysynyń úmitin arqalap kelgen Ermahan Ánýarbekovke ese jiberdi. Ermahan fınalǵa deıingi qarsylastaryn aıqyn utyp, fınaldyq beldesýde mańǵystaýlyq Meıirlan Maksımnen basym tústi. Qola medal Qudiret Dosymov (Shymkent) pen Aıdar Arapovqa (Túrkistan oblysy) buıyrdy. 100 kg salmaqta shymkenttik Marat Baıqamyrov chempıon atandy. Fınaldyq básekede almatylyq Beıbit Mádıevten basym tústi. Qola medaldi Ermuhan Estaı (Astana), Ersultan Muzapparov (Shymkent) enshiledi. Asa aýyr salmaqta (+100 kg) Ádil Orazbaev (Abaı oblysy) fınaldyq tartysta Elaman Erǵalıevti (Qyzylorda oblysy) jyqty. Mádı Edilbaev (Almaty oblysy), Jambyl Turǵynǵalıevke (Jambyl oblysy) qola medal buıyrdy.
Áıelder dodasynda da jas talanttar jarqyraı kórindi. Ásirese 48 kg salmaqtaǵy tartys qarqyndy ótti. Jetisý oblysynyń balýany Dıana Búrkeeva fınalda shymkenttik Sabına Iýldashbekovany jeńip, chempıon atandy. Arýjan Danaıbek (Jambyl oblysy) men Zarına Hýsnadın (Almaty qalasy) qola medal enshiledi.
52 kg salmaq dárejesinde de jas býyn qarymyn kórsetti. 23 balýannyń arasynan fınaldyq tartysqa Tolǵanaı Ábeýova (Aqmola oblysy) men Almaty oblysynyń úmiti Arýjan Erejepova shyqqan. Tolǵanaıdyń mereıi ústem túsip, chempıon atandy. Qola júlde Sara Shuǵaeva (Almaty qalasy), Qundyz Jylqybaıǵa (Qyzylorda oblysy) buıyrdy. О́zge salmaqtarda myna balýandar oljaly boldy. 57 kg: 1. Baqyt Qusaqbaeva (Aqtóbe oblysy), 2. Dana Ábdirova (Atyraý oblysy), 3. Karına Qarekenova (Abaı oblysy), Dına Muhanbet (Qyzylorda oblysy). 63 kg: 1. Esmıgúl Kýıýlova (Atyraý oblysy), 2. Samalaı Erǵalıeva (Qostanaı oblysy), 3. Uldana Tańjaryqova, Asyljan Orynbasarova (ekeýi de Jambyl oblysy). 70 kg: 1. Ekaterına Tokareva (Almaty oblysy), 2. Krıstına Sotnıkova (Abaı oblysy), 3. Dıana Telbaeva (Qaraǵandy oblysy), Ajar Ashat (Abaı oblysy). 78 kg: 1. Arýna Jangeldına (Aqtóbe oblysy), 2. Nazerke Tileýhanova (Abaı oblysy), 3. Zámzagúl Faızollanova (Shymkent qalasy), Anastasııa Nagachevskaıa (Almaty qalasy). +78 kg: 1. Nazgúl Maratova (SQO), 2. Aıymzada Dýmanqyzy (Atyraý oblysy), Aıda Toıshybekova (Qaraǵandy oblysy), Aıdana Ǵazızqyzy (Qyzylorda oblysy).
Parıj jazǵy Olımpıadasynyń chempıony Eldos Smetov, olımpıadanyń qola júldegeri Ǵusman Qyrǵyzbaev, álem chempıonatynyń júldegeri Ábıba Ábýjaqynova el chempıonatyn tamashalap, jankúıerlik etti. «Jastar ósip keledi eken, básekelestik týyndaǵanda órleý bolady. Árbir salmaqta keıingi tolqynnyń myǵym ekenin baǵamdadyq. Bizdiń alǵan asýymyzdan da asatyn balýandardyń shyǵatynyna senemin», dedi Eldos Smetov.