Elimizdiń ulttyq quramasy ÝEFA Ulttar lıgasynyń toptyq kezeńin sátsiz aıaqtady. Fýtbolshylarymyz qarymdy qarsylastaryna toıtarys bere almady. Reseılik maman Stanıslav Cherchesov bas bapkerlik tizgindi ustaǵaly ulttyq qurama qatarynan 5 matchta utyldy.
Aldymen Aýstrııa quramasynyń ekpini jaıynda birer sóz. Almatynyń «Ortalyq stadıonynda» ótken tartysta 0:2 esebi tirkeldi. Germanııanyń «RB Leıpsıg» klýbynda oınaıtyn jartylaı qorǵaýshy Krıstof Baýmgartner 15-mınýtta esep ashty. Stanıslav Cherchesovtiń baptaýyndaǵy ulttyq qurama qarymta shabýyldan nátıje shyǵarmady. 23-mınýtta Aleksandr Marochkın oıyn erejesin buzyp, alańnan qýyldy. «Fraıbrýg» (Germanııa) klýbynyń shabýylshysy Mıhael Gregorıch 25-mınýtta ekinshi goldy soqty.
Ulttyq quramanyń bas bapkeri laýazymyna Stanıslav Cherchesov taǵaıyndalǵaly fýtbolshylar ÝEFA Ulttar lıgasynda bes oıyn ótkizip, tórteýinde jeńildi. Áli qarsylas qaqpasyna birde-bir gol soǵa alǵan joq. О́zi qaqpashy bolǵan Cherchesovtiń tálimin alatyn fýtbolshylarymyz bes matchta óz qaqpalaryna 10 gol jiberip aldy. Toptyq kezeńdegi sońǵy oıyndy 17 qarashada syrt alańda, Norvegııa quramasyna qarsy ótkizip, oısyraı utyldy.
ÝEFA Ulttar lıgasynyń V dıvızıonynda tartysqa túsý bizdiń quramaǵa áli de erte sııaqty. Norvegııada ótken sońǵy match muny aıqyndaı tústi. Oıyn asa tartysty ótken joq. Tipti 1-taımda bizdiń jigitter Norvegııa ulttyq quramasynyń qaqpasyna týra soqqy baǵyttaı da almady. 19 jastaǵy Antonıo Nýsanyń ózi úsh-tórt oıynshynyń ortasynan sytylyp ketip otyrdy. Norvegııa ulttyq quramasynyń kapıtany Erlıng Holann 23, 37, 71-mınýttarda gol soǵyp, het-trık jasady. Serlot 41-mınýtta tórtinshi goldy toǵytsa, Nýsa 76-mınýtta besinshi goldy soqty.
Ulttyq quramaǵa 2022-2023 jyldar órleý kezeńi boldy. Reseılik maman Magomed Ádıev bas bapkerlik tizgindi 2022 jyldyń mamyr aıynda ustady. Sol jyly ÝEFA Ulttar lıgasynyń «S» dıvızıonynda bizdiń fýtbolshylar kósh bastady. Byltyr Eýropa chempıonatyna irikteý synynda ótkizgen 10 matchta 6 ret jeńip, 4 oıynda jeńildi. 18 upaımen qurlyq birinshiliginiń fınaldyq kezeńine synyq súıem jetpeı toqtady.
S.Cherchesov bıyl maýsym aıynda ulttyq quramanyń bas bapkeri laýazymyna taǵaıyndaldy. Sol aıda ulttyq qurama Armenııa, Ázerbaıjan quramalaryna qarsy joldastyq match ótkizip te jeńilgen edi.