Zambııanyń Lýsaka qalasynda badmıntonnan Dmıtrıı Panarın chempıon atandy. «Zambia International Challenge 2024» halyqaralyq týrnırine 25 elden sportshylar qatysty. Dmıtrıı bıyl Parıj jazǵy Olımpıadasyna da qatysqan bolatyn. Biraq irikteý synynan asa alǵan joq, japon Kenta Nıshımotoǵa ese jiberdi.
23-24 qarasha kúnderi elordadaǵy «Beeline Arena» sport kesheninde para dzıýdodan «Grand Prix» jarysy ótedi. 15 memleketten 100-ge tarta balýan qatysatyn dodada el úmitin arqalaıtyn balýandar J1 sanatynda kúresedi. Týrnırge qatysýshylar 10 salmaq dárejesinde júldelerdi sarapqa salady. Olımpıada sıkline oraı salmaq dárejeleri ózgerip, erler 70, 81, 95, +95 kg-da tartysqa túsedi. Al áıelder 52, 60, 70, +70 kg-da kúsh synaıdy. Sonymen qatar Halyqaralyq dzıýdo federasııasy tájirıbe retinde Olımpıada baǵdarlamasyna enbeıtin eki salmaqta da balýandardy beldestirmek. Erler 64 kg, áıelder 46 kg salmaqta synǵa túsedi.
Búgin Kanadanyń Vankýver qalasynda semserlesýden álem kýboginiń kezeńi ótedi. 24 qarashaǵa deıin jalǵasatyn jahandyq saıysta Rýslan Qurbanov, Elmır Álimjanov, Vadım Sharlaımov, Erlik Sertaı, Kırıll Pavlovqa senim artylmaq. Elimizdiń sportshylary buǵan deıin álem kýboginiń kezeńinde 7-oryn ıelengen bolatyn.
Astana qalasynda 29 qarasha kúni «WrestlingStars» halyqaralyq týrnıri ótedi. Álemdik arenada olja salyp júrgen dańqty balýandar elorda tórinde tartysqa túsedi. Olardyń arasynda erkin kúresten eki dúrkin álem chempıony, tórt dúrkin Eýropa chempıony, Rıo Olımpıadasynyń qola júldegeri, ıtalııalyq Frenk Chamızo, jastar arasynda álem chempıony, jerlesimiz Ishar Qurbaev, qyrǵyzstandyq Ulyqbek Joldoshbekov syndy sańlaqtar bar. Týrnırge erkin kúresten Azııa chempıondary Danııar Qaısanov pen Sanjar Dosjanov, úsh dúrkin Azııa chempıony, Álem chempıonatynyń qola júldegeri Azamat Dáýletbekov, álem birinshiliginiń kúmis júldegeri Horlan Jahansha da qatysady.