Prezıdenttiń tapsyrmasy boıynsha jańa Sý kodeksiniń jobasyna tasqyn jáne erigen qar sýynyń aldyn alý jáne qorǵaý is-sharalary engizildi, dep habarlaıdy Egemen.kz.
Sý resýrstary jáne ırrıgasııa mınıstrliginiń baspasóz qyzmetiniń málimetinshe, atalǵan vedomstvo, Májilis depýtattary, sarapshylar qujatty pysyqtaýdy jalǵastyryp jatyr. Kodekstiń jobasyna sáıkes, eldi mekenderdi jáne nysandardy qorǵaý úshin jergilikti atqarýshy organdar bógetter, mobıldi qorshaýlar, aınalma arnalar, ýaqytsha sý qoımalaryn salý jumystaryn júrgizýi kerek jáne tasqyn men erigen sýdan qorǵaný turǵysynda orman ekpelerin otyrǵyzýdy júzege asyrýy tıis.
О́z kezeginde, basseındik josparlar elimizdegi 8 sý sharýashylyǵy basseıniniń árqaısysyna qajetti is-sharalardy anyqtaıdy. Sondaı-aq, atalǵan kodeks jobasy jaýyn-shashyn men topyraq ylǵaldylyǵynyń deńgeıin baqylaýdy, qurǵaqshylyq kezeńi úshin tasqyn sýyn jınap saqtaýdy, sý únemdeıtin tehnologııalardy engizýdi jáne qurǵaqshylyqqa tózimdi daqyldardy paıdalaný arqyly aýyl sharýashylyǵyn beıimdeýdi kózdeıdi.
«Qujat – memlekettik organdardyń sý tasqyny men qurǵaqshylyqqa qarsy is-qımyl máselesindegi ókilettikterin naqty aıqyndaıdy. Engizilgen túzetýler – sý sektorynyń klımattyń ózgerýine beıimdelýine, sýdyń zııandy áseriniń qaýpin azaıtýǵa jáne gıdrotehnıkalyq qurylystardyń qaýipsizdigin arttyrýǵa jaǵdaı jasaıdy», dedi vedomstvonyń Sý saıasaty departamentiniń dırektory Serikjan Beketaev.