2025 jyldyń sáýir aıyna deıin Aral teńizine shamamen 1,6 mlrd tekshe metr sý jiberý josparlanyp otyrǵanyn sala mınıstri Nurjan Nurjigitov málim qyldy, dep habarlaıdy Egemen.kz.
Mınıstr azamattardy qabyldap, Aral teńizin saqtaý máselesi týraly suraqtarǵa jaýap berdi.
«Jyl basynan beri Soltústik Aralǵa shamamen 2 mlrd tekshe metr sý jiberildi. Búginde teńizdegi sýdyń jalpy kólemi 22 mlrd tekshe metrge jetti. Sý dıplomatııasy men Ortalyq Azııadaǵy áriptesterimizben tyǵyz jumystan bólek, teńizdi toltyrýda sý únemdeý tehnologııalaryn engizý de mańyzdy ról atqarady. Jańa tehnologııalardy engizýdiń nátıjesinde bıyl Qyzylorda oblysynyń sharýalary 200 mln tekshe metrge jýyq sý únemdedi. Bul sý Soltústik Aralǵa jiberildi. Másele óte mańyzdy, biz ony jan-jaqty qarastyryp, únemi baqylaýda ustaımyz», dedi mınıstr Nurjan Nurjigitov.
Eske salaıyq, mınıstr Túrkimenstanda ótken kórshi eldermen kelissózder qorytyndysy boıynsha 1-shi sáýirge deıin Shardara sý qoımasyna 11 mlrd tekshe metr sý jiberý týraly kelisken bolatyn. Bul elimizdiń ońtústik aımaqtaryna 2025 jylǵy sýarý maýsymy úshin qajetti sý kólemin jınaýǵa múmkindik beredi.