ASTANA. 1 aqpan. Germanııanyń kansleri Angela Merkel Grekııanyń qaryzdaryn syzyp tastaý múmkindigin joqqa shyǵardy. Bul týraly Lenta.ru habarlady.
«Jeke kredıtorlar bul qaryzdardy syzyp tastaýdan bas tartty», - dedi osyǵan oraı nemis úkimetiniń basshysy. «Men qaryzdardy budan ári syzyp tastaýdyń eshbir múmkindigin kórip turǵan joqpyn», - dep atap ótti Merkel.
Kansler eske salǵandaı, Afınaǵa qarjylaı kómek berýdi odan ári jalǵastyrýdyń basty sharty Grekııada reformalardy júzege asyrý bolyp tabylady. Osy rette Merkel Eýropanyń Grekııamen jáne basqa da elderdi daǵdarystan alyp shyǵý úshin olarmen «yntymaqtastyqty jalǵastyra beretinin» bildirdi. Biraq bul úshin olardyń ózderi aldymen «reformalardy ómirge engizip, únemdeý saıasatyn ustanýlary» tıis.
Germanııa kansleri grektiń jańa úkimetiniń eldi daǵdarystan shyǵarýǵa arnalǵan óz ekonomıkalyq baǵdarlamasy bolýy kerektigin aıtty.
Qańtardyń 25-i kúni ótken Grekııanyń parlament saılaýynda SIRIZA partııasy jeńiske jetken edi. Onyń lıderi saılaý ótken boıda Grekııanyń burynǵydaı qatań únemdeý tártibimen ómir súrmeıtinin, bul úshin úsh basty kredıtordan eldiń qaryzdaryn qaıta qarap, bir bóligin joıǵyzyp jiberetinderin málimdegen edi. Qazir Ellada eliniń barlyq qaryzdary jalpy ishki ónimniń 150 paıyzyn quraıdy. Munyń ózi budan ári damýdyń óte qıynǵa túsetinin kórsetedi.
Murat Aıtqoja.
Derek, foto: Lenta.ru.