Semeı qalasynda máslıhattardyń qurylǵanyna 30 jyl tolýyna arnalǵan oblystyq forým ótkizildi. Is-sharaǵa 450-den asa qatysýshy jınaldy. Olardyń qatarynda Parlament Senatynyń depýtattary Qaırat Tastekeev pen Aınur Arǵynbekova, «Qazaqstan máslıhattary depýtattarynyń birlestigi» tóraǵasy Tóleýbek Muqashev, sondaı-aq ardagerler men barlyq deńgeıdegi depýtattar bar.
Forýmda demokratııa men jergilikti ózin-ózi basqarý júıesin nyǵaıtýdaǵy máslıhattardyń róli ataldy. Halyqpen qarym-qatynasty nyǵaıtýda, el ishinde qordalanǵan máselelerdi jergilikti bılikke jetkizýde depýtattardyń atqaratyn qyzmeti de shet qalǵan joq. Oblystyq, qalalyq jáne aýdandyq máslıhattardyń qurylýy – elimizdiń demokratııalyq damýyndaǵy mańyzdy belesteriniń biri ekeni daýsyz. Halyq pen bılik arasyndaǵy «altyn kópir» bolǵan bul memlekettik ınstıtýt eldik múdde jolynda óziniń tıimdiligin kórsetip kele jatyr.
«Abaı eli qaıta túlep, eńse kótergende de, bizdiń depýtattyq korpýs óziniń saıası belsendiligi men jaýapkershiligin kórsete bildi. Oraıy kelgende, óńirdiń áleýmettik-ekonomıkalyq damýyna zor úlesin qosqan barsha depýtattarǵa shynaıy rızashylyǵym men alǵysymdy bildirgim keledi», dedi jıynda sóz alǵan óńir basshysy Nurlan Uran- haev.
Forým barysynda qoǵamdyq jumystarǵa belsene aralasyp, qarapaıym halyqtyń alǵysyna bólengen depýtattar Parlament Senaty men Májilisiniń, mınıstrlikterdiń, sondaı-aq oblys ákiminiń jáne oblys máslıhaty tóraǵasynyń Qurmet gramotalary men Alǵyshattary tabystaldy. Elimizdiń damýyna eleýli úles qosqan depýtattarǵa arnaıy marapat – «Qurmetti depýtat» ataǵy berildi.
Semeı