Qazaqstan Prezıdenti Qasym-Jomart Toqaev sársenbi kúni Reseı Prezıdenti Vladımır Pýtınmen bolǵan kezdesýinde eki el arasyndaǵy strategııalyq baılanystarǵa erekshe toqtaldy.
Qazaqstan Prezıdenti Pýtındi elordadaǵy rezıdensııasynda qabyldaý kezinde Qazaqstan jahandyq kúrdeli kezeńde Reseıdiń senimdi strategııalyq seriktesi ári odaqtasy ekenin, aldaǵy ýaqytta da bul baǵyttan aınymaıtynyn atap ótti.
Memleket basshysy ekijaqty qarym-qatynastar strategııalyq seriktestiktiń berik irgetasy negizinde nyǵaıyp kele jatqanyn málimdedi.
Qaýipsizdik máselelerin talqylamaq
Reseı Prezıdenti Vladımır Pýtın Ortalyq Azııadaǵy odaqtasymen qarym-qatynasty nyǵaıtýǵa baǵyttalǵan eki kúndik saparmen Qazaqstanǵa bardy.
Sondaı-aq bul saparda UQShU uıymyna múshe Qazaqstanmen qaýipsizdik máselelerin talqylamaq.
Pýtınniń sapary qarsańynda reseılik «Izvestııa» gazetinde jarııalanǵan maqalasynda Qasym-Jomart Toqaev Qazaqstan men Reseı kóppolıarly álem, beıbit dıalog, barlyq memlekettiń egemendigin qurmetteý sııaqty ıdeıalardy dáriptep, halyqaralyq arenada ózara tabysty qarym-qatynas jasap otyrǵanyn atap ótti.
Ǵaryshty birlesip zertteıdi
Jańa jahandyq tártip jaǵdaıynda strategııalyq áriptestikti tereńdetý týraly qos el prezıdentteriniń birlesken málimdemesinde taraptar 70 jyldyq mereıtoıy kelesi jyly keńinen atap ótiletin «Baıqońyr» ǵarysh aılaǵynyń tarıhı mańyzy týraly ortaq ustanymdaryn rastady.
«Baıqońyr» ǵarysh aılaǵy – jalpyadamzattyń ortaq ıgiligi», dedi Qasym-Jomart Toqaev pen Vladımır Pýtın birlesken málimdemede. Olar ǵaryshty birlesip zertteýdi odan ári jalǵastyrýǵa ýaǵdalasty.
Odaqtastyq barlyq salada damyp keledi
Qazaqstan men Reseıdiń yntymaqtastyǵy shyn máninde odaqtastyq sıpatta jáne barlyq salada belsendi túrde damyp keledi. Bul týraly «Kazahstanskaıa pravda» gazetinde jarııalanǵan Reseı Prezıdenti Vladımır Pýtınniń maqalasynda aıtylǵan.
Reseı Prezıdenti Qazaqstanǵa kezekti memlekettik sapary qarsańynda jaryq kórgen maqalasynda eki el arasyndaǵy qarym-qatynastardyń qazirgi jaǵdaıy men bolashaǵy týraly óz kózqarasymen bólisti. Ol Reseı Qazaqstannyń iri ekonomıkalyq seriktesteriniń biri ekenin atap ótti.
Dostyqty tereńdetýge daıyn
V.Pýtın Qazaqstan gazetinde jarııalanǵan maqalasynda Qazaqstannyń mádenı, rýhanı-adamgershilik qundylyqtaryna degen yntasyn joǵary baǵalap, Astanamen dostyq jáne odaqtastyq qarym-qatynastardy odan ári damytýǵa daıyn ekenin aıtty.
Sársenbide Reseıdiń memlekettik BAQ-tary Pýtınniń ushaǵy elordaǵa qonǵan sátiniń túsirilimin kórsetti. Pýtın damyp kele jatqan ekonomıkalyq alıansty keńeıtýdiń de ortaq kelisimderi týraly másele qozǵady.
Birlesken jobalardy pysyqtady
Reseı Prezıdenti Vladımır Pýtın Qazaqstan Prezıdenti Qasym-Jomart Toqaevtyń shaqyrýymen Astanaǵa memlekettik saparmen keldi.
Qazaqstan Reseıdiń ejelden áskerı jáne ekonomıkalyq seriktesi jáne alpaýyt kórshimen 7 500 shaqyrym (4 650 mıl) shekarany bólisedi.
Eki el basshylary kelissózder barysynda saýda-energetıkalyq baılanystardy da talqylap, birqatar birlesken jobany egjeı-tegjeı pysyqtady. Sondaı-aq eki el prezıdentteri birneshe qujatqa qol qoıyp, BAQ ókilderine arnalǵan málimdeme jasady.