Sátbaev ýnıversıtetinde oqý ordasynyń 90 jyldyq mereıtoıyna oraılastyryp, jańa stýdentter jataqhanasy qurylysynyń bastalýyna oraı bolashaq urpaqqa joldaý jazylǵan irgetas kapsýlasy saltanatty túrde salyndy, dep habarlaıdy Egemen.kz.
«Biz 955 oryndyq 9 qabatty jańa jataqhananyń qurylysyn bastaýdy josparlap otyrmyz, aldaǵy 2026 jyly stýdentter bizden kilt alyp, qonystanyp, jańa jerde óz ómirlerin bastaı alady», dedi Sátbaev ýnıversıteti Qurylys departamentiniń dırektory Rıshat Tynybekov.
Jańa jataqhana «Qarjy ortalyǵy» AQ jáne QR Ǵylym jáne joǵary bilim mınıstrliginiń qoldaýymen júzege asyrylyp jatqan «Bes áleýmettik bastama» atty memlekettik baǵdarlamasy negizinde stýdentterdi jańa jataqhanalardaǵy orynmen qamtamasyz etý aıasynda salynady. Jobany ınvestor Forum Invest jáne EPC Stroy Group qurylys kompanııasy 100% qarjylandyrady, bul qurylys qazirdiń ózinde Almaty qalasynyń qala qurylysy keńesimen maquldanǵan.
«EPC Stroy Group» kompanııasynyń basshysy Erlan Qojyqov óz sózinde kompanııanyń Sátbaev ýnıversıtetimen jumys isteýge qýanyshty ekenin, óıtkeni bul olardyń el bolashaǵyna qosqan úlesi ekenin basa aıtty:
«Biz bolashaq ınjenerleri, elimizdiń bolashaq elıtasy jaqsy bilim alýǵa qolaıly jaǵdaı jasaý úshin ınvestısııa salýǵa daıynbyz. Biz qurylysta ekologııalyq taza jáne energııany únemdeıtin materıaldardy qoldanamyz, seısmıkalyq tózimdilik boıynsha barlyq zańnamalyq normalardy saqtaımyz jáne jataqhanany 2026 jyldyń aqpan aıynda paıdalanýǵa berýdi josparlap otyrmyz», dedi ol.
Is-sharaǵa jobaǵa qatysýshy barlyq jeti taraptyń ókilderi qatysty: ýnıversıtettiń Qamqorshylyq keńesiniń tóraǵasy, professor Ulyqpan Sydyqov, ýnıversıtettiń Aqsaqaldar keńesi men Rektorlar keńesinen professor Ábdiǵappar Áshimov, Almaty qalasy ákimdiginiń Jastar saıasaty bóliminiń meńgerýshisi Azız Qajdenbek, «Qarjy ortalyǵy» AQ Almaty qalasyndaǵy ókildiginiń dırektory Ulan О́tebaev, «EPC Stroy Group» kompanııasynan Dınara Baıymbetova jáne oqytýshylar men stýdentter qatysty.
«Qazaq halqynda «jeti» degen qasıetti san bar. Bul irgetasty jeti túrli uıymnyń ókilderi salǵanyna nazar aýdaryńyzdar. Olardyń árqaısysy osy stýdenttik jataqhana óte mańyzdy ekenin túsinedi. Endeshe búgingi jumysymyz jemisin berip, jańa jataqhana «Dos-Muqasan» izbasarlary ósip-órkendeıtin qutty mekenge aınalsyn», dedi Ulyqpan Sydyqov óz sózinde.
Ýaqyt kapsýlasyn salý Sátbaev ýnıversıtetiniń jáne onyń ınfraqurylymynyń damýyndaǵy jańa kezeńniń bastalǵanyn bildirdi. Jańa jataqhana stýdentterge qolaıly jaǵdaı jasaıdy jáne Sátbaev ýnıversıtetiniń Qazaqstandaǵy ınnovasııalyq jáne tehnıkalyq bilim berýdiń jetekshi ortalyǵy retindegi mártebesin nyǵaıtýǵa kómektesedi.