Malaızııa men Taılandtyń ońtústiginde mýssondyq jańbyrdan týyndaǵan qatty sý tasqyny 30-dan astam adamnyń ómirin qıdy. Sondaı-aq ondaǵan myń turǵyn úılerin tastap ketýge májbúr bolǵan. Eki el de tolassyz jaýǵan jańbyrǵa baılanysty baspanalar men evakýasııa josparlaryn ázirlep jatyr, dep habarlaıdy Egemen.kz Associated Press agenttigine silteme jasap.
Malaızııa premer-mınıstri Anvar Ibragım ótken aptada eldiń shyǵys jaǵalaýynda bolǵan bes kúndik jańbyr sońǵy alty aıdaǵy jaýyn-shashynǵa teń bolǵanyn jáne soltústik-shyǵystaǵy Kelantan men kórshi Terengganý shtaty shyǵynǵa ushyraǵanyn aıtty.
Sheneýnikterdiń aıtýynsha, sý tasqyny kúrish alqaptarynyń úlken bóligin basyp, fermerlerge mıllıondaǵan dollar shyǵyn ákelgen. Sondaı-aq nóser Kelantan men Malaızııanyń basqa bólikterinde joldardy, úılerdi jáne qoǵamdyq ınfraqurylymdy zaqymdaǵan.
Premer-mınıstr búlingen ınfraqurylymdy qalpyna keltirýge shamamen 1 mıllıard rınggıt (224 mıllıon dollar) qajet ekenin málimdedi.
Tabıǵı apattardy basqarý ulttyq ortalyǵynyń málimetinshe, jeti shtattan 85 000-ǵa jýyq adam evakýasııadan keıin mektepterde, qoǵamdyq ortalyqtar men kómek kórsetý ortalyqtarynda qalǵan.
Sý tasqyny saldarynan Malaızııada kem degende alty adam qaza tapty, al Taılandtyń ońtústiginde qaza tapqandar sany odan da kóp ekeni habarlandy.
Tolastaǵan sýdan 300 myńnan astam úı sharýashylyǵy men mektepter, medısınalyq mekemeler zardap shekken.