XII halyqaralyq Birimjanov sezi ótti

Ǵylymı basqosýdy QazUÝ basqarma tóraǵasynyń orynbasary-birinshi prorektor mindetin atqarýshy Erkin Dúısenov ashyp, el damýyndaǵy hımııa ǵylymynyń mańyzyn atap ótti.

«Memleket basshysy Qasym-Jomart Toqaev elimizdiń ónerkásiptik jáne ekonomıkalyq órkendeýiniń irgetasy bolyp qalanǵan hımııa ǵylymyn damytý qajettiligine basa nazar aýdaryp keledi. Ál-Farabı atyndaǵy QazUÝ-da ozyq zertteýler júrgizý úshin, onyń ishinde hımııa salasynda barlyq jaǵdaılar jasalǵan. 2024 jyldyń maýsym aıynda hımııa jáne hımııalyq tehnologııa fakýltetinde aldyńǵy qatarly jabdyqtarmen jabdyqtalǵan 9 zamanaýı zerthanany qamtıtyn Farabi Chem Science zamanaýı klasteri ashyldy. Qoldanbaly hımııa turaqty damý úshin jańa materıaldar, tehnologııalar men sheshimder jasaýǵa jol ashady» dedi Erkin Ermanuly.

QazUÝ túlegi, О́nerkásip jáne qurylys mınıstrligi hımııa ónerkásibi basqarmasynyń basshysy Azamat Qalen óz sózinde qazirgi tańda óndiris jáne hımııa salasyn bilikti kadrlarsyz alǵa jyljymaıdy degen pikir bildirdi.  Osy baǵytta tıisti mınıstrlik QazUÝ-ǵa mamandar daıarlaý isinde qoldaý kórsete otyryp, bilikti kadrlarmen hımııa ónerkásibin qamtamasyz etýge ázir ekenin bildirdi.  

Qazaqstan-Amerıka Erkin ýnıversıtetiniń prezıdenti Erejep Mámbetqazıev sharaǵa arnaıy joldaǵan quttyqtaý hatynda «Búginde Qazaqstan iskerlik, órkenıetti álemge senimdi túrde enýde. Bul táýelsiz Respýblıkanyń bilimi men ǵylymyna eleýli úles qosqan QazUÝ túlekteriniń eleýli eńbegi. Bolashaqta Qazaqstan-Amerıka Erkin ýnıversıtetiniń bazasynda hımıkterdiń kelesi forýmyn uıymdastyrýǵa daıynmyn» dep atap ótti.

Hımııa ǵylymdarynyń doktory, professor, UǴA korrespondent-múshesi Batyrbek Birimjanov tabıǵı tuz, paıdalaný joly, tyńaıtqyshtar hımııasy, qurlyqtyq tuz túzilý teorııasy, Qarataý jáne Aqtóbe fosforıtterinen konsentrlengen tyńaıtqysh alý tehnologııasyn zerttegen. Ǵalymnyń zertteýleri fosfor jáne bor qyshqyldaryn tazartýdy usyna otyryp, kúrdeli tuzdardy sıntezdeý, shahta peshterinde kúkirtti natrıı óndirý ádisteriniń óndiristegi tıimdiligimen erekshelenedi. Osy oraıda Batyrbek Birimjanov atyndaǵy qazaqstandyq hımııa qoǵamynyń tóraǵasy, akademık, forýmnyń bastamashylarynyń biri Muhambetqalı Búrkitbaev plenarlyq otyrystyń ashylýynda hımııa ǵylymy, bilim berý jáne ónerkásip salasyndaǵy jetistikterdi tilge tıek etti. Ǵalymnyń pikirinshe, sarqylmaıtyn shıkizat resýrstarynyń múmkindikterin, eldiń áleýetin tolyq paıdalaný úshin naqty sheshimder ázirlep, ǵylym, bilim jáne ónerkásip aldynda turǵan mindetterdi anyqtaý óte mańyzdy.

Plenarlyq sessııada «Janý máseleleri ınstıtýtynyń» ǵylymı jetekshisi, Birimjanov seziniń bastamashysy Zýlhaır Mansurov, Nazarbaev ýnıversıtetiniń ónerkásip pen ózara is-qımyl jónindegi vıse-provost Jumabaı Bákenov jáne qazirgi kezdegi joǵary ulttyq hımııa mektebiniń (ENSCR) ókili Sılven Jırov baıandama jasady.

Shara aıasynda «Hımııa ónerkásibi úshin kadrlardy daıarlaý» paneldik jıyny, «Indýstrııa jáne ýnıversıtet», «Zertteýlerdi kommersııalandyrý: ǵylymdy bızneske aınaldyrý», «Hımııa jáne hımııalyq tehnologııadaǵy jasandy ıntellekt jáne sıfrlyq tehnologııalar», «Hımııany oqytýdyń syn-qaterleri: jańa strategııalar», «Farmasevtıka salasyndaǵy jańa trendter» taqyrybyndaǵy semınarlar, bos oryndar jármeńkesi men óndiristik kompanııalar kórmesi jalǵasyp jatyr.

Sharany ál-Farabı atyndaǵy QazUÝ, S. О́tebaev atyndaǵy Munaı jáne gaz ýnıversıteti, KAZHIMIIа hımııa ónerkásibi qaýymdastyǵy, Munaı-gaz-hımııa ónimderin óndirýshiler men tutynýshylar qaýymdastyǵy birlesip uıymdastyrdy.

Dástúrli halyqaralyq sharaǵa álemniń túkpir-túkpirinen hımııa salasynyń bilikti ǵalymdary, sarapshylar men jas zertteýshiler, bıznes jáne ónerkásip salasynyń 250-den astam ókilderi jınaldy.

ALMATY