Kanadanyń «Hellosafe» saraptamalyq platformasy jyldy qorytyndylap, 186 memlekettiń ekonomıkalyq órkendeý ındeksin usyndy. Dúnıejúzilik bank pen BUU derekteri negizinde júrgizilgen taldaýda elimiz «ekonomıkalyq damý ındeksi» reıtıngine kirgen. Indeksimiz 47,36-ny qurap, Reseı, Belarýs, Qytaı, Túrkııa, Ortalyq Azııa elderin basyp ozdy.
Zertteýshiler jan basyna shaqqandaǵy IJО́, ulttyq jınaq deńgeıi, adam damýynyń ındeksi (HDI), Djını koeffısıenti (qoǵamdyq teńsizdik kórsetkishi), kedeılik deńgeıi sııaqty negizgi ındıkatorlarǵa mán berdi. Reıtıng nátıjesi keıingi jyldary ekonomıkamyzdyń ilgeri basqanyn kórsetedi. Muny negizgi ekonomıkalyq kórsetkishterdiń artýy da rastaıdy.
«HelloSafe» zertteýi úzdikter qatarynda Eýropa elderi basym ekenin kórsetti. Olardyń arasynda Lıýksembýrg (86,2), odan keıin Norvegııa (85,1), Irlandııa (84,7) kósh bastap tur. Eýropalyq emes elder arasynan Qatar men Sıngapýr ǵana alǵashqy bestikten oryn alǵan. Bul – olardyń serpindi ekonomıkasy men damyǵan ınfraqurylymynyń kórinisi.
Oǵan qosa jýyrda «S&P» agenttigi elimizdiń óńdeýshi salalarynyń qarasha aıyndaǵy ındeksin de jasaǵan edi. Ondaǵy jaǵdaı qazanǵa qaraǵanda, qarashada jaqsara túsken. О́ndiris, jumyspen qamtý, satylym ulǵaıǵan. О́ndiriske qajet resýrs quny qarqyn alyp, qarashada jańa tapsyrystar rekord jasady. Bul týraly «Freedom Holding Corp.» eldegi óńdeýshi salalar «PMI®» óndiristik kórsetkishter týraly esebinde aıtty. Bul úderis óndiris kólemi men satyp alý belsendiliginiń artýyna, jumys ornyn ashýdy toqtatpaýǵa septesken. Teńge baǵamy álsiregennen qazan aıynan beri ınflıasııalyq qysym kúsheıgeni belgili. Satyp alý menedjerleriniń ındeksi kórsetkishi qazan aıynda 51.7-den 53.5-ke deıin ósti. Demek óńdeý ónerkásibindegi ahýal anaǵurlym jaqsarǵan. Oǵan qosa bıznes júrgizý sharttary tamyz aıynda tirkelgen joǵary nátıjeden asyp, aıtarlyqtaı kúsheıdi.