2024 jyldyń basynan bastap QR Oqý-aǵartý mınıstrligine qarasty Balalardyń quqyqtaryn qorǵaý komıteti 242 bilim berý uıymyna tekserý júrgizdi. Onyń ishinde 108 tekserý jergilikti jerlerge barý arqyly júzege assa, 13 tekserý jospardan tys turǵyndardyń aryz-ótinishteri negizinde júrgizilgen.
Aıta keteıik, 2024 jyldan bastap «Bala quqyqtary týraly» QR Zańynyń 52-1 jáne 52-2-baptary kúshine endi. Munda oblystar men respýblıkalyq mańyzy bar qalalarda bilim berý uıymdary men basqarý organdaryna qatysty memlekettik baqylaýdy júrgizýge qoıylatyn jańa tártip pen talaptar aıqyndalǵan. Atalǵan jumys balalardyń quqyqtaryn qorǵaý salasyndaǵy quqyqbuzýshylyq faktilerin anyqtaýǵa baǵyttalǵan.Tekserýler 25 bilim bóliminde jáne óńirlerdiń segiz bilim basqarmasynda júrgizilgen. Nátıjesinde 15 laýazymdy tulǵaǵa sot sheshimi boıynsha ákimshilik aıyppul salyndy, 65 tulǵa tártiptik jaýapkershilikke tartylǵan.
«Mınıstrlik balalardyń quqyqtaryn qorǵaý salasyndaǵy jergilikti atqarýshy organdar tarapynan buzýshylyqtardy, onyń ishinde mekteptegi as máziriniń belgilengen tamaqtaný normalaryna sáıkes kelmeýi, sabaqtardy júıeli túrde ótkizetin balalarǵa áser etýdiń tıimdi sharalarynyń bolmaýy, oqýshylardyń jekelegen sanattaryna áleýmettik kómek kórsetý erejeleriniń saqtalmaýy jáne t.b. faktilerdi tirkedi. Bul máseleler jergilikti bılik pen bilim berý uıymdary tarapynan erekshe nazar aýdarýdy talap etedi», dedi Nasymjan Ospanova.Tekserý qorytyndysy boıynsha Balalardyń quqyqtaryn qorǵaý komıteti 121 usynym jáne buzýshylyqtardy joıý týraly 151 nusqama joldaǵan. Sondaı-aq usynymdardyń oryndalýyn taldaý turaqty negizde júzege asyrylady, onyń barysynda Túrkistan, Jambyl jáne Qyzylorda oblystarynda berilgen usynymdardyń sapasyz oryndalýy anyqtalǵan.
QR «Bilim týraly» Zańynyń 6 babyna sáıkes balabaqshalar, mektepter, qosymsha bilim berý uıymdary jergilikti atqarýshy organdardyń qaramaǵynda. Sondaı-aq, atalǵan uıymdardyń basshylaryn taǵaıyndaýdy ákimdikterdiń qurylymyndaǵy bilim basqarmalary júzege asyrady.Aıta keteıik, balalardyń quqyqtaryn qorǵaý men qamtamasyz etý jumystary áli de jalǵasyp jatyr.