Ult pen ultty, el men eldi biriktiretin shekarasyz álem – óner. Kıeli qalam ushymen halyq qasıetin beınelegen ozyq oıly qalamgerlerdiń biri, Qytaıdaǵy qazaq jazýshysy – Akbar Majıttiń 70 jasy L.N.Gýmılev atyndaǵy Eýrazııa ulttyq ýnıversıtetinde atalyp ótti.
Qytaı Halyq Respýblıkasy Halyqtyq Saıası Konsýltatıvtik Keńesiniń depýtaty, Qytaı Jazýshylar odaǵy baspa korporasııasynyń vıse-prezıdenti, «Qytaı jazýshylary» jýrnalynyń bas redaktory, jazýshy, aýdarmashy Akbar Majıttiń mereıtoıyna arnalǵan «Qazaqstan-Qytaı: mádenı-rýhanı baılanystar kókjıegi» taqyrybyndaǵy dáriske akademık Serik Negımov, professor Raqymjan Turysbek, jazýshy Tursynhan Zákenuly syndy zııaly qaýym ókilderi, ýnıversıtet oqytýshylary men stýdentter qatysty. Eýrazııa ulttyq ýnıversıtetiniń rektory Erlan Báttashulynyń quttyqtaý hatyn prorektor Ardaq Beısenbaı oqyp berdi.
– Mádenıet pen ádebıette ornyńyzdy aıshyqtaǵan iri tulǵa ekenińiz kópke málim. Sizdiń aýdarmalaryńyz arqyly qytaı eli uly Abaımen tanysty. Tek ádebıetshi, ǵalym ǵana emes, kórkem tilmen oqyrman júregine jol tapqan sheber qalamgersiz. Shyǵarmalaryńyz oqyrmannyń ystyq yqylasyna bólenip, joǵary baǵasyn alyp jatyr. Búgingi mereıli jasyńyzben quttyqtaı otyryp, myqty densaýlyq, shyǵarmashylyq tabys tileımin, – degen rektor quttyqtaý hatynda.
Basqosýda jazýshy Akbar Majıt atqarǵan eńbekterine toqtalyp, uly Abaıdy aýdarý barysyn sóz etti.
– Áýeli maǵan Abaı aýdarmasyna redaktorlyq jasap berýdi ótindi. Biraq aýdarmaǵa qarasam, óńdeýge kelmeıdi eken. Bir aıdan soń uly aqyndy túnimen aýdaryp ákelip bergenimde, «mine, naq Abaıdyń ózi eken» dep bas redaktorym maqtaı jóneldi. Sodan, mine, aqynnyń qara sózderin qazaq tili men qytaı tilinde qatar basyp jınaq etip shyǵardyq. Sonymen birge Abaıdyń 175 jyldyq mereıtoıy qarsańynda aqynnyń óleńderin de aýdaryp, qytaı tilinde basyp shyǵarýǵa usynys tústi. Men bul usynysqa kelisip, úsh-tórt aıdyń kóleminde Abaıdyń búkil jyrlaryn aýdaryp shyqtym. Solaısha hakimniń jeke kitaby Qytaıdyń «Ádebıet» baspasynan basylyp shyqty, – dedi Akbar Majıt.
Jazýshy sonymen birge Qytaıda shyǵatyn «Ulttar ádebıeti» jýrnalyna qazaq ádebıetiniń shyǵarmalary jarııalanýyna uıytqy bolǵanyn, ondaǵy az halyqtar men qytaıdyń qazirgi ádebı úderisi haqynda aıtyp ótti.
Jazýshy mereıtoıyna alashtanýshy ǵalym Tursyn Jurtbaıdyń joldaǵan úshbý hatyn jazýshy Tursynhan Zákenuly jetkizdi.
Akbar Majıtuly jazýshylyq bıiktiń namysty, jankeshti jáne eń abyroıly sarbazy, jaýyngeri. Ol, mine, elý jyldaı ýaqyttan beri namys qalamyn rýh qarýy retinde ısi adamzattyń ıgiligine jumsap keledi. Onyń qalamy názik te ójet oıly shyǵarmalar arqyly qazaqtyń kúıinishi men súıinishin adamzattyń úshten birin quraıtyn úlken halyqtyń qaperine jetkizdi. Jetkizip qana qoıǵan joq, bir jarym mıllıard adam onyń talantyn moıyndady. Sonymen qatar Akbar Majıtuly azamattyq, qaıratkerliktiń de nysanaly tulǵasy, – degen jazýshy, ǵalym Tursyn Jurtbaı.
Munan soń akademık Serik Negımov sóz alyp, qalamgerdiń tulǵalyq bolmysyna toqtaldy.
– Hakimniń tereńine súńgý, sol zamannyń kelbetin tanytý – qaharmandyq der edim. Sondyqtan qaıratkerlikti, rýh qazyǵyn berik ustaǵan kósem tulǵasyz. Sizdi mereıli jasyńyzben quttyqtaı otyryp, bar jaqsylyqty tileımin! – dedi ol.
Keshke jınalǵan zııaly qaýym ókilderi men stýdentter jazýshynyń shyǵarmalary haqynda oılaryn órbitti. Akbar Majıt ýnıversıtet rektorynyń sheshimimen «Kúltegin» medaliniń ıegeri atandy.