Alash joly – altyn qazyq

Baıqaýdyń ashylý rá­siminde sóz sóı­legen «Aq jol» partııasynyń tóraǵasy Azat Perýashev: «Ulttyq ıdeologııa – kez kelgen memlekettiń tiregi, ol halyq pen memleket arasyndaǵy altyn kópir ispetti. Qazaq eli úshin Alashtan asqan, Alashtan ózge ulttyq ıdeıa joq. Al ıdeıa – tiri dúnıe, ol únemi damyp, tereńdep, keńeıip otyrýy kerek. Bizdiń baıqaý – dál osy Alash ıdeıasyn jańǵyrtýǵa arnalǵan bastama. Baıqaýǵa qatysýshylardyń árqaısysy osy ıdeıanyń damýy­na óz úlesterin qosyp jatyr», dedi.

Bıyl 13-ret uıymdas­ty­­rylyp otyrǵan baıqaýǵa 250-den astam stýdent pen maman jumystaryn jiberipti. Qorytyndy keze­ńinde qyzý pikirtalas órbip, sapaly baıandamalar jasaldy. Jal­pyulttyq baıqaýǵa Par­la­ment Májilisindegi «Aq jol» fraksııasynyń apparat jetekshisi Berik Dúısembınov, Parlament Májilisiniń depýtaty Serik Erýbaev, IIM B.Beısenov atyndaǵy Qaraǵandy akademııasynyń bastyǵy, polısııa polkovnıgi Nurlan Bıekenov jáne partııanyń máslıhat depýtattary qatysty. QR UǴA akademıgi, alashtanýshy Dıhan Qamzabekuly, L.N.Gýmılev atyndaǵy EUÝ «Alash» ınstıtýtynyń dırektory, PhD Sultan Han Aqqululy, PhD, MNU assıstent-professory Alma Saılaý­qyzy qazylyq etse, EUÝ qazaq kafed­rasynyń professory, alashtanýshy Qaıyrbek Kemeń­ger qorytyndy is-sharany moderator retinde júrgizip otyrdy.

Irikteý kezeńinen ótken qa­tysýshylardyń baıandamalary men pikirsaıystarynyń nátıjesinde, «Alash qaırat­kerleriniń Alash respýblı­kasynyń memlekettik qu­ry­lymy týraly ıdeıasy jáne onyń qazirgi Qazaqstan úshin ózek­tiligi» atalymy, «Alash qaı­ratkerleriniń oqý-aǵartý men ǵylymdaǵy ustanymy jáne onyń qazirgi Qazaqstan úshin mańyzy», «Alash qaıratkerleriniń eko­nomıkalyq kózqarasy jáne kásipkerlikti damytý», «Alash respýblıkasy – aldyńǵy qazaq memleketteri (Kóne Túrki qa­ǵanattary, Ulyq ulys – Altyn orda, Qazaq han­dyǵy) men qa­zirgi táýelsiz Qazaq eliniń zań­namalyq sabaq­tastyǵyn jal­­ǵaıtyn kópir» atalymdary boıynsha elimizdiń túkpir-túk­pirinen qatysqan shy­ǵarma­shylyq tulǵalarǵa júld­e­li oryndar tabystaldy.