Álemdegi eń bedeldi reıtıng agenttikteriniń biri «S&P Global Ratings» elimizdiń bank júıesine qatysty baǵalaýyn jaqsartty. Buryn bank júıesi 8-topta tursa (munda táýekelder kóp degen sóz), qazir 7-topqa kóterildi.
«Bicra» reıtınginde bir saty kóterildik. Bank sektorynyń salalyq táýekelderi azaıǵan. Iаǵnı burynǵyǵa qaraǵanda turaqtyraq ári qaýipsiz bolyp otyr. «S&P Global Ratings» málimdeýinshe, buǵan Qarjy naryǵyn retteý jáne damytý agenttigi jasaǵan sharalar áser etken. Olar jyl boıy bank júıesindegi daǵdarystyń aldyn alýǵa, naryqtyq ózgeris kezinde turaqty operasııalyq qyzmet jasaýǵa tyrysqan. S&P pikirinshe, bul sharalar eldiń qarjylyq ornyqtylyǵyn jaqsartýǵa yqpal etken. Máselesi kóp kredıtterdiń úlesi azaıǵan. 2020 jyly 18% bolsa, qazir 7-7,5%-ǵa tómendegen. Bul jetistik eldegi 7 bankke óz reıtıngin jaqsartýǵa múmkindik berdi.
Sonda qandaı sharalar jasalǵan degen suraq týýy múmkin. «S&P» bul saýalǵa da jaýap bere ketipti. Birinshiden, jyl boıyna bankterdegi táýekelderdi baqylaý kúsheıgen. Ekinshiden, aktıvterdiń sapasyn baǵalaý (AQR) júıesi engizilip, bankterdiń jaǵdaıy naqty tekserile bastaǵan. Úshinshiden, tutynýshylyq kredıtterdi baqylaý qatańdady, ıaǵnı halyqqa shamadan tys nesıe berilmeýin qadaǵalady. Tórtinshiden, qadaǵalaý júıesi jetilgen.
Zertteýge qarap, bank júıesiniń turaqty ekenin ári qaýiptiń azaıǵanyn kóremiz. Bank sektorynyń makroekonomıkalyq syn-tegeýrinder men geosaıası táýekelderge ornyqtylyǵy baıqalady. Al bir qyzyǵy, agenttik otandyq bankter aktıvteriniń sapasy men qarjylyq kórsetkishteri kútkennen de asyp túskenin habarlap otyr.