Premer-mınıstr Oljas Bektenov venchýrlyq qarjylandyrý salasyndaǵy jetekshi sarapshylar, otandyq bıznes-qoǵamdastyq ókilderi jáne halyqaralyq áriptestermen kezdesý ótkizdi. Talqylaýdyń basty taqyryby jahandyq kapıtaldy tartýǵa, startap-ekojúıeni damytýǵa jáne Qazaqstannyń óńirlik tehnologııalar men ınnovasııalar ortalyǵy retindegi ustanymyn nyǵaıtýǵa baǵyttalǵan Venchýrlyq ınvestısııalar qorlary qoryn qurý boldy, dep habarlaıdy Egemen.kz Úkimettiń baspasóz qyzmetine silteme jasap.
Dıalogqa shaqyrylǵan Stenford ýnıversıtetiniń professory jáne venchýrlyq ınvestısııa boıynsha tanymal sarapshy Ilıa Strebýlaev, Andreessen Horowitz seriktesi Malıka Aýbakırova jáne Lightspeed Venture Partners seriktesi Ǵalym Imanbaev, sondaı-aq DCVC ınvestısııalar jónindegi dırektory Anna Fokına ınnovasııalardy damytýdaǵy óz tájirıbelerimen bólisti. Sarapshylar Qazaqstanǵa eleýli progreske qol jetkizý úshin álemdik jetekshi venchýrlyq ınvestısııalar qorlarymen yntymaqtastyqty nyǵaıtý mańyzdy ekenin atap ótti. Bul ınvestısııalardy basqarýdyń ozyq tehnologııalary men ozyq tájirıbelerine qol jetkizýdi qamtamasyz etýge múmkindik beredi. Olar jahandyq kapıtaldy tartý úshin quqyqtyq ınfraqurylymdy nyǵaıtyp, startaptardy damytýdyń keıingi kezeńderinde qoldaýǵa jaǵdaı jasaý qajettigin aıtty.
Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev Qazaqstan óńirdiń barlyq venchýrlyq mámileleriniń 70%-dan astamyn qamtamasyz etip, Ortalyq Azııada kóshbasshylyq ustanymdy ıelenip otyrǵanyn atap ótti. Sońǵy bes jylda elimizdegi venchýrlyq kapıtal kólemi alty eseden astam ósip, $80 mln-ǵa jetken.
Aıta keteıik, qordyń qurylýy Qazaqstannyń ınvestısııalar men tehnologııalardyń halyqaralyq ekojúıesine ıntegrasııalanýyna baǵyttalǵan eldiń venchýrlyq kapıtal naryǵyn damytýdyń jańa kezeńin bildiredi.
Venchýrlyq ınvestısııalar qorlary qory orta merzimdi perspektıvada jetekshi álemdik, óńirlik jáne otandyq venchýrlyq qorlarǵa baǵyttalatyn $1 mlrd jeke ınvestısııalardy tartýǵa baǵyttalǵan. Bul tıimdi ártaraptandyrýdy, ekonomıkany transformasııalaý úshin qajetti jahandyq quzyretter men asa mańyzdy tehnologııalarǵa barynsha qol jetkizýdi qamtamasyz etýge múmkindik beredi. Búgingi tańda qordyń bastapqy kapıtalyn qalyptastyrýǵa otandyq iri bıznes ókilderinen $100 mln-nan astam somaǵa ótinimder jınaldy.
«Qor jumysynda jasandy ıntellekt, sıfrlyq densaýlyq saqtaý jáne basqa da negizgi tehnologııalyq salalardy qosqanda, perspektıvaly baǵyttarǵa erekshe nazar aýdarylatyn bolady. 2030 jylǵa qaraı álemdik jasandy ıntellekt naryǵy $827 mlrd-qa deıin ósedi dep boljanýda, bul salany ınvestısııalar úshin basym baǵyttardyń birine aınaldyrady», delingen habarlamada.
Premer-mınıstr Oljas Bektenov Venchýrlyq ınvestısııalar qorlary qoryn qurý ozyq tehnologııalarǵa qoljetimdilikti ashyp qana qoımaı, Qazaqstannyń halyqaralyq startaptar men tehnologııalar haby retindegi ustanymyn nyǵaıtady dep atap ótti.
«Prezıdent Qasym-Jomart Toqaev atap ótkendeı, biz bilim men ınnovasııaǵa negizdelgen ekonomıka quryp jatyrmyz. Búginde Qazaqstanda IT sektory belsendi damyp keledi, sıfrlyq qyzmetter eksporty artyp, jas mamandar el ishinde de, shetelde de suranysqa ıe bolyp otyr. Bizdiń basty mindetimiz – ózimizdiń talanttarymyzdy saqtap qalýǵa jáne jańa daryndardy tartýǵa jaǵdaı jasaý, startaptardy damytýdyń barlyq kezeńinde qoldaý jáne Qazaqstanǵa jahandyq quzyretterdi tartý», dedi Oljas Bektenov.