Respýblıkalyq bıýdjetten bólingen qarjy esebinen Talǵarda 50 otbasy jańa páterlerine kóship, baspana qýanyshyna bólendi. Bul joba Qazaqstan Respýblıkasy Indýstrııa jáne ınfraqurylymdyq damý mınıstrliginiń jáne Talǵar aýdany qurylys bólimimen birlesken jumysynyń nátıjesinde júzege asty.
Jańa qonystanýshylar arasynda 10 jetim bala men ata-anasynyń qamqorlyǵynsyz qalǵan balalar bar, olarǵa jaıly jaǵdaıda derbes ómir bastaý múmkindigi berildi. Taǵy 10 páter kópbalaly otbasylarǵa, sonyń ishinde «Altyn alqa», «Kúmis alqa», «Ana dańqy» I jáne II dárejeli ordenderimen marapattalǵan, «Batyr Ana» ataǵyn alǵan analarǵa berildi. Qalǵan 30 páterdi óz baspanasyna qol jetkizýde qıyndyq kórip júrgen turǵyndar ıelendi.
«Búgin biz úshin erekshe kún. Biz tek páterdiń kiltin alyp qana qoımaı, jańa ómirge qadam basqandaımyz. Bul qoldaý – qıyn jaǵdaıǵa tap bolǵan adamdar úshin shynaıy kómek. Budan bylaı ózimizdiń jańa úıimizde baqytty bolyp, bolashaqqa senimmen qaraıtynymyzǵa qýanyshtymyz. Baǵdarlama tek bizge ǵana emes, basqa da kómekke muqtaj otbasylarǵa da qoldaý kórsetedi dep senemiz» dep atap ótti kópbalaly ana Maıra Baımurzaeva.
Bul bastama tek turǵyn úı máselesin sheship qana qoımaı, aýdannyń áleýmettik turaqtylyǵy men ádilettiligin nyǵaıtýǵa yqpal etedi. Jyl sońyna deıin áleýmettik osal toptar qataryndaǵy kezekte turǵandarǵa arnalyp taǵy 47 páter satyp alý josparlanǵan.
«Áleýmettik turǵydan qorǵalmaǵan toptar úshin turǵyn úı máselesin sheshý – bizdiń basty mindetimiz. Jańa páter ıelerin qýanyshtarymen quttyqtaımyn. Aldaǵy alty aıda Talǵar aýdanynda 450-den astam páter paıdalanýǵa beriledi», dedi páter kilitin tabystaǵan Talǵar aýdanynyń ákimi Tanat Aıdarbekov.
Almaty oblysy