QR Bas prokýratýrasy asa iri mólsherde alaıaqtyq jasaǵany úshin qylmystyq jaýaptylyqqa tartý maqsatynda Qazaqstan azamatyn Reseı Federasııasynan ekstradısııalady, dep habarlaıdy Egemen.kz.
Bas prokýratýranyń málimetinshe, kúdikti 2023 jyly Koreıa Respýblıkasynan avtokólikterdi naryqtyq baǵadan tómen baǵamen jetkizýge ýáde berip, alaıaqtyq jolmen 6 jábirlenýshiniń (Almaty qalasy turǵyndarynyń) qarajatyn ıemdenip, olarǵa jalpy kólemde 145 mıllıon teńgeden astam zalal keltirgen. Qylmys jasaǵannan keıin kúdikti jasyrynyp, soǵan baılanysty ol halyqaralyq izdeýge jarııalanǵan.
«Bıylǵy jyldyń sáýirinde ol Reseı Federasııasynyń Krasnodar ólkesinde ustalyp, sodan keıin Qazaqstan Respýblıkasy Bas prokýratýrasynyń suraýy boıynsha Otanyna ekstradısııalandy. Qazir kúdikti tergeý ızolıatoryna qamaldy», delingen habarlamada.
Kúdiktige aıyptalǵan qylmysty jasaǵany úshin múlki tárkilenip, bes jyldan on jylǵa deıingi merzimge bas bostandyǵynan aıyrý jazasy qarastyrylǵan.