18 myńnan astam qandas atajurtqa oraldy

Eńbek jáne halyqty áleýmettik qorǵaý mınıstr­li­giniń málimdeýin­she, jyl basynan elge kelgen aǵaıyn­dar­dyń 45,4%-y – Qy­­taıdan, 38,9%-y – О́zbek­stan­nan, 6%-y – Moń­ǵo­lııa­dan, 5,8%-y – Túrik­men­stan­nan, 2,7%-y – Reseıden, 1,3%-y basqa elderden kelgen. 1 jeltoq­sandaǵy jaǵdaıǵa sáıkes eńbekke qabiletti jastaǵy shetten qonys aýdarýshylar sany 57,1%, eńbekke qabiletti jas­tan kishiler 33,4%, zeınetkerler 9,5% boldy. Ártúrli óńirge qonystanǵan eńbekke qabiletti jastaǵy qonys aýdarýshylardyń bilim dárejesi: bilim deńgeıi joǵary – 17,5%, orta kásibı bilimdi – 25%, jalpy orta bilimdi – 54,7%, 2,8%-nyń bilimi joq.

Kóship kelgen aǵaıyn­dardy eńbek kúshi tap­shy sanalatyn Aqmola, Abaı, Qostanaı, Pavlodar, ShQO, SQO aýmaǵyna qonys­tan­dyrý tıimdi júrgizi­lip jatyr. 2024 jylǵa arnalǵan qonystandyrý kvotasy 3 033 adamǵa belgilengen. Resmı derekke súıensek, 1 jeltoqsanǵa deıin qonys­tandyrý kvotasy 2 961 adamǵa aýdaryldy. Joǵa­ry­da atalǵan óńirlerde qo­nys­tanǵan qandastarǵa sýbsıdııa túrinde beriletin memlekettik qoldaý is-sha­ralary da bar. Aıtalyq, bir mezgilde otaǵasyna, otbasynyń árbir múshesine 70 AEK (258,4 myń teńge) mól­sherinde; turǵyn úı jaldaý­ǵa, kommýnaldyq qyz­­metterge aqy tóleýge – bir jyl ishinde 15-ten 30 AEK (55,3-den 110,7 myń teńge­ge deıin) mólsherinde sýbsıdııa beriledi.

Jyl basynan beri 2 624 qonystanýshyǵa túrli qoldaý kórsetildi. Atap aıtqanda, 794 adam turaqty jumysqa ornalastyrylǵan. Sonymen qatar erikti qonys aýdarýdyń tıimdiligin art­­­tyrý maqsatynda azamat­­­tardy eńbek kúshi tap­shy óńirlerge qonys aýda­­­rý­ǵa qatysatyn jumys berý­shilerdi qoldaý jónin­de ınstıtýsıonaldyq sharalar qabyldandy. Úı satyp alý, úı salýǵa nemese ıpotekalyq turǵyn úı qa­ryz­darynyń bastapqy jar­nanyń bir bóligin jabýǵa ekonomıkalyq utqyrlyq sertıfıkaty beriledi. Tur­ǵyn úı qunynyń 50%-y nemese bir otbasyna 4,28 mln teńgege deıin mól­she­rinde birjolǵy óteý­siz, qaıtarymsyz negizde en­gizildi. Osyǵan deıin 2 449 adam utqyrlyq sertıfıkatyn aldy.

О́tken jyly Qazaqstan elshilik­teri arqyly «bir tereze» qaǵı­datymen «qandas» már­tebesin berý tetigi iske asyryldy. Qanatqaqty joba aıasynda el aýmaǵyna kirmeı-aq «qandas» mártebesin alýǵa bolady. Búginde bul jańa formatta 22 myńnan astap ótinish kelip túsken eken. Demek jat jerdegi qandastarymyzdyń Otanǵa oralýǵa degen yqylasy áli de joǵary.