Memleket basshysy Qasym-Jomart Toqaev «Ana tili» gazetine bergen suhbatynda qazaq tiliniń básekege qabileti jáne ony úırenýge degen qyzyǵýshylyq barynsha artyp keletinin aıtty, dep jazady Egemen.kz.
Prezıdenttiń pikirinshe, eń bastysy, qazaq tilin bilý sánge aınalyp, jastarymyz ony meńgerýge umtylatyn bolǵan.
«Memlekettik til azamattardyń qyzmet babynda ósýine jáne tabysqa jetýine jol ashatyn mańyzdy faktor sanalady. Elimizdiń bıznes ókilderi marketıng salasyndaǵy naýqandaryn qazaq tilinde sóıleıtin tutynýshylardyń suranysyna qaraı ótkizetin boldy. Munyń bári memlekettiń óte abaı bolýdy qajet etetin ári saıası turǵydan mańyzdy sanalatyn osy saladaǵy saıasaty tıimdi júrgizilip jatqanyn kórsetedi», dedi Memleket basshysy.
Aıta keteıik, dúnıe júzinde 7 myńnan astam til bar. Sonyń ishinde úsh myńnan astam tilge joıylyp ketý qaýpi tónip tur. Qazaq tili bul topqa kirmeıdi. Ana tilimiz 2024 jyly álemde eń keń taralǵan tilderdiń arasynda 79-shy orynǵa turaqtady.
Osy rette Qasym-Jomart Toqaev kúrdeli ári qarama-qaıshylyqqa toly keńes zamanynda ana tilimizdi álemdik lıngvıstıka kartasynan joıylyp ketýden saqtap qalǵan zııaly qaýym ókilderiniń, aqyn-jazýshylardyń, jýrnalıster men ǵalymdardyń, muǵalimder men mádenıet qaıratkerleriniń, aýyl eńbekkerleriniń, ıaǵnı barsha otanshyl azamattardyń eńbegin baǵalaýymyz kerek ekenin tilge tıek etti.
«Budan da joǵary nátıjege qol jetkizý úshin ǵylym-bilim salasyndaǵy ınfraqurylymdy jańǵyrtýǵa, mektepter men basqa da oqý oryndarynda qazaq tilin úıretý júıesin jetildirýge qosa oqytýshylardyń mártebesin arttyrý máselesin de sheshý qajet. 2023 jyly «Qazaq tili» qoǵamynyń bastamasymen qurylǵan arnaýly qorǵa qoldaý kórsetý kerek. Sıfrlyq tehnologııalardy qoldanýǵa basa mán bergen jón. О́ıtkeni qazaq tiliniń aldaǵy taǵdyry, elimizdiń jahandyq básekege qabileti kóbine osyǵan baılanysty bolady», dedi Prezıdent.
Áńgime barysynda Memleket basshysy shyǵarmashyl jastar jáne kreatıvti ındýstrııa memlekettik tildi damytý isine paıdasyn tıgize alatynyna toqtaldy.
«Memleket ekonomıkadaǵy bolashaǵy zor osy salanyń órkendeýine barynsha qoldaý kórsetedi. Otandyq jáne álemdik naryqta qarjylyq jaǵynan tıimdi ári suranysqa ıe bolatyn túrli kontentti qazaq tilinde jasaý qajet. Bul jerde ádebıet, mýzyka, kıno, serıal jáne kompıýter oıyndary týraly aıtyp otyrmyn.
Ana tilimizdiń bolashaǵy jarqyn ekenine meniń esh kúmánim joq. Qazaq tili memlekettik til retinde halqymyzdy uıystyrý jolynda mańyzdy ról atqara beredi. Biraq tilimizdiń tuǵyryn nyǵaıtamyz dep, ony basqa tilderge, sonyń ishinde orys tiline qarsy qoımaý kerek», dedi Qasym-Jomart Toqaev.