Almatyda eki er adamnan 190 sim-karta jáne tórt sim-box tárkilendi, dep habarlaıdy Egemen.kz Polisia.kz saıtyna silteme jasap.
Internet-alaıaqtar respýblıka aýmaǵynda túrli messendjerler arqyly el azamattaryna qońyraý shalý úshin sim-box qurylǵylaryn paıdalanǵan.
QR IIM atap ótkendeı, adamdardy aldaý úshin qylmyskerlerdiń belgili bir elde bolýy mindetti emes. Sim-box qurylǵylarynyń bolýy jetkilikti. Olar jergilikti uıaly baılanys operatorlarynyń ınternet-trafıgin qoldana otyryp, jalǵan nómirlermen baılanys ornatýǵa múmkindik beredi.
«Jańa jyl qarsańynda IIM kıberqylmysqa qarsy is-qımyl departamentiniń úılestirýimen Almaty PD polısııa qyzmetkerleri jaldamaly páterde sim-box qurylǵysynyń úzdiksiz jumysyn qamtamasyz etken 25 jastaǵy eki jigitti ustady. Jedel ýákilder páterdi tintý kezinde árqaısysy 32 slottyq tórt sim-box qurylǵysyn jáne qazaqstandyq uıaly baılanys operatorlarynyń 190 sim-kartasyn, birneshe telefon men noýtbýktardy tárkiledi», delingen habarlamada.
Tergeý amaldary júrgizilip jatyr. Ustalǵandarǵa qatysty «qamaýda ustaý» bultartpaý sharasy tańdaldy.