Qyzylorda oblysyndaǵy aýyldardyń birinde jappaı tóbeles boldy. Jelide oqıǵa ornynan túsirilgen kadrlar tarady, dep habarlaıdy Egemen.kz.
Vıdeonyń jazbasynda tóbelestiń 5 qańtarda Aral aýdany Jaqsyqylysh aýylynda bolǵany aıtylǵan.
Kadrlarda aýyl kósheleriniń birinde top-top jastardyń júrip bara jatqanyn kórýge bolady.
Aıqaı men polısııa sırenasynyń dybysy estiledi.
Polısııanyń málimetinshe, buzaqylyq baby boıynsha qylmystyq is qozǵaldy.
- Tergeý barysynda polısııa qyzmetkerleri janjalǵa qatysqandardyń jeke basyn anyqtap jatyr. Qylmystyq is materıaldary boıynsha quqyqtyq baǵa beriledi, - dep habarlady oblystyq polısııa departamentiniń baspasóz qyzmeti.
Aral aýdandyq kópsalaly ortalyq aýrýhanasynda medısınalyq kómek surap eshkimniń habarlaspaǵanyn aıtty.
Aral aýdandyq ákimdigi tóbeleske 2004-2007 jyly týǵan 15-20-ǵa jýyq adam qatysqanyn habarlady.
- 5 qańtarda saǵat shamamen 23:00-de Jaqsyqylysh aýylynda jastar top bolyp tóbelesti. Quqyq qorǵaý organdarynyń jedel áreketiniń arqasynda janjal dereý tyıyldy. Tóbeleskenderdiń eshqaısy aýyr dene jaraqattaryn almady. Qazirgi ýaqytta Qylmystyq kodekstiń 293-babyna ("Buzaqylyq") sáıkes, sotqa deıingi tergeý amaldary júrgizilip jatyr. Aýdan ákimdigi quqyq qorǵaý organdarymen birlese túngi reıdter uıymdastyryp jáne qylmystyń aldyn alý boıynsha qajetti sharalardy qabyldap jatyr, - dep habarlady ákimdik.