Qarjylyq monıtorıng agenttigi valıýtalyq operasııalardy júzege asyrý kezindegi saqtyq sharalardy saqtaýdyń mańyzdylyǵyna toqtaldy, dep habarlaıdy Egemen.kz vedomstvonyń baspasóz qyzmetine silteme jasap.
Vedomstvo málimetinshe, jelide azamattar shynaıy aqshany jalǵan nemese sývenırlik aqshamen shatastyratyn beıneler keńinen taralǵan.
«Bul beınerolıkter adamdar tıisti nazar aýdarmaı, shynaıy aqshany jalǵan nemese sývenırlik aqshadan ajyrata almaıtynyn jáne zańsyz operasııalarǵa qatysý sııaqty jaǵymsyz saldarǵa ákep soǵatynyn kórsetedi», dep habarlady QMA baspasóz qyzmeti.
Jalpy, 2024 jyldyń basynan bastap Qazaqstan aýmaǵynda aınalymnan 2 myńǵa jýyq jalǵan banknota alynyp, qarjylyq turaqtylyqqa eleýli qaýip tóndirgen. Jalpy alynǵan jalǵan aqshalardyń somasy 80 mıllıon teńgeden asqan.Jalǵan banknota jasaýmen jáne satýmen aınalysqan 8 adam sottalǵan. Olar 5 jyldan 6 jylǵa deıingi merzimge bas bostandyǵynan aıyrylǵan.
«Mundaı jaǵdaılardy boldyrmaý úshin aqshalaı operasııalar kezinde banknotalardy tekserińiz. Aqsha qaǵazynyń sapasyna, qorǵanysh elementterine (mórtańbasy, mıkroelementter, belgili bir jaryqta kórinetin belgileri) jáne tekstýra men shrıftine nazar aýdaryńyz. Jalǵan aqsha jasaýshylardyń qurbany bolyp qalmaý jáne qylmystyq qýdalaýǵa túspeý úshin, bóten adamdarmen aqsha almastyryp, valıýta aıyrbastaý boıynsha qolaıly kýrs usynsa da deldaldarmen mámile jasamaǵanyńyz durys», delingen habarlamada.