Majarlyq ylǵal saqtaıtyn preparatty synaqtan ótkizýdiń alǵashqy kezeni aıaqtalyp, sala mınıstrligi nátıjesin jarııalady, dep habarlaıdy Egemen.kz.
Atalǵan synaqqa Taraz qalasyndaǵy «Qazaq sý sharýashylyǵy ǵylymı-zertteý ınstıtýty», Qyzylordadaǵy «Y.Jaqaev atyndaǵy Qazaq kúrish sharýashylyǵy ǵylymı-zertteý ınstıtýty», «Maqta jáne baqsha aýyl sharýashylyǵy tájirıbe stansııasy», «Agrarlyq ınnovasııalar ınstıtýty» qatysqan.
Sý resýrstary jáne ırrıgasııa mınıstrliginiń málimetinshe, ǵalymdar preparatty qoldana otyryp kúrish alańynda 37%-ǵa deıin sý únemdeýge bolatynyn málimdegen. Sebebi, dástúrli ádis boıynsha kúrish 90 kún boıy sýarylady. Al ylǵal saqtaıtyn preparatty paıdalanǵan kezde 51 kún sýarý jetkilikti. Qant qyzylshasy alańynda 23,9%, júgeride 28,7%-ǵa deıin sý únemdelgen. Budan bólek, sarapshylar ónimdilik te artqanyn aıtady.
«Synaqtyń alǵashqy kezeńi jaqsy nátıje kórsetti. Kelesi kezekte úlken kólemdegi egis alqaptarynda preparattyń tıimdiligin tekserý kerek. Ol úshin sharýalarmen kezdesip, synaq nátıjesin kórsetý kerek. Túsindirý jumystaryn júrgizý qajet. Sebebi, jyl ótken saıyn sýarmaly sýǵa suranys artyp keledi jáne bizdiń dıqandar zamanaýı sý únemdeý ádisterine kóshýge múddeli», dedi mınıstr Nurjan Nurjigitov.
О́z kezeginde majarlyq «Soil solution» kompanııasynyń ókilderi sharýalar tarapynan úlken suranys bolsa Qazaqstanda preparat shyǵaratyn zaýyt ashýǵa nıetti ekendikterin málimdedi.
«Biz Qazaqstanda óz ónimimizdi shyǵaratyn zaýyt ashý múmkindigin de qarastyryp jatyrmyz. Osy arqyly jol shyǵynyn azaıtýǵa bolady. Demek, sharýalar úshin preparattyń baǵasy birneshe ese arzandaıdy. Sondaı-aq Qazaqstanda jasalǵan ónim retinde shetelge de eksporttaýǵa bolady», dedi «Soil solution» kompanııasynyń ókili Danıel Repassı.