Oral qalasynda Jantas Safýllınniń balalarǵa arnalǵan «Syrym batyr» komıksi jaryq kórdi. Jas urpaqqa týǵan jerdiń tarıhyn tanystyryp, ulttyq rýhyn kóterýdi maqsat etken kitap batyr tulǵasyn jan-jaqty sıpattaıdy.
Jańa týyndy ata-analarǵa tarıhymyz ben tabıǵatymyzdy balaǵa qyzyqty etip tanystyrýǵa kómekshi qural bola alady. Komıks mazmunyna toqtalsaq, saparǵa shyqqan áke men bala «Syrym shyqqan tóbe» dep atalatyn tustaǵy kesenege toqtap, ákesi balasyna qasıetti orynnyń tarıhyn áńgimelep beredi. Úlkenderdiń aıtýy boıynsha, bul tarıhı oqıǵa HVIII ǵasyrdyń aıaǵynda bolǵan. Otarlaýdy maqsat tutqan sany men kúshi basym jaýdy Syrym batyr aqylmen aılasyn asyryp betin qaıtarǵan. Muzdaı qarýlanǵan qalyń áskerden halqyn aman saqtap, jerin qorǵap erlik jasaǵan orynǵa 2007 jyly arnaıy kesene turǵyzylǵan. Syrym batyrdyń erligi este saqtaýǵa jeńil bolý úshin óleńmen órilip, kórkem sýrettermen árlenip, komıks janryna beıimdelgen. Oqıǵa jelisin óleńmen órgen – Nurlan Sádir men Ǵaısaǵalı Seıtaq.
«2021 jyly osy komıksti daıyndaýǵa kiriserdiń aldynda Syrym shyqqan tóbege arnaıy bardym. Aınala kók jıekke deıin anyq kórinedi, sholyp qaraýǵa óte yńǵaıly jer eken. Tóbeniń ústinde, janynda qasqyrdyń apandary bar», deıdi avtor.
«Dana» ortalyǵynan 2 000 danamen shyqqan komıks oblys kitaphanalaryna taratylady. QR-kod arqyly komıks-kitaptyń beınenusqasyn qaraýǵa bolady. Balanyń jadyna saqtaýǵa sep bolsyn dep arnaıy tapsyrma men sózjumbaq usynylǵan.
Sondaı-aq bul kitap túrik tiline de aýdarylǵan. Tárjimalaǵan – Nursáýle Ahatova. Komıkstiń túrikshe nusqasyn basyp shyǵarý da josparda bar.
Aıta keteıik, Jantas Safýllınniń buǵan deıin «Jetpis balýan» komıksi jaryq kórgen edi. Avtordyń aıtýynsha, komıkster serııasy aldaǵy ýaqytta da jalǵasady.