Sınoptıkter Soltústik Qazaqstan oblysynda bıyl da sý tasqyny bolady dep boljap otyr, biraq onyń aýqymy áli belgisiz. Mamandardyń aıtýynsha, oblysta 116 eldi mekendi sý basý yqtımaldyǵy joǵary, dep habarlaıdy Egemen.kz.
Qyzyljar aýdanyndaǵy Beskól aýylynyń turǵyny Maqpal Jaǵyparovanyń úıin ótken jyldyń 12 sáýirinde sý basqan. Sý úsh jyl buryn ǵana salynǵan úıdiń tereze jaqtaýlarynyń deńgeıine deıin kóterilip, búkil múlik jaramsyz bolyp qalǵan.
Úıdi retke keltirý úshin shatyr, qabyrǵalar men terezelerden basqanyń barlyǵyn aýystyrýǵa týra keldi. Qazir qabyrǵalarda jaryqtar paıda bolyp, olar keńeıip jatyr.
«Sý tasqyny týraly habarlanǵanda, 11 sáýirde úıimizden ketýge májbúr boldyq. Irgetasyn bıik qoıdyq, biraq sý 2 metrge deıin kóteriledi dep oılamadyq. Sý deńgeıi tómendegen kezde onyń saldaryn 5 mamyrda joıýǵa kiristik. Úı jańa, gaz bloktarynan turǵyzylǵandyqtan, turýǵa jaramdy boldy. Tıisti aqshany aldyq, týystarym, dostarym, aýyldastarym, tipti oqýshylarym da qarjylaı kómek kórsetti. Jaz boıy jóndeý jumystaryn júrgizdik, endi bul jumystyń nátıjesiz qalý qaýpi bar. Ýaıymdap otyrmyz», deıdi Beskól aýylynyń turǵyny.
Qart turǵyndar Esilde kóktemde buryn-sońdy mundaı sý tasqyny bolmaǵanyn aıtady. Sondyqtan tabıǵat apatyna turǵyndar ǵana emes, arnaıy qyzmet ókilderi de daıyn bolmady.
Saldarynan oblysta 4 myńǵa jýyq úıdi sý basqan. Onyń teń jartysy Qyzyljar óńirinde. Úlken sý tasqynynyń jolynda 22 eldi meken boldy. Qaýipsiz jerge jetkizilgen 8,6 myń adamnyń 1,5 myńy evakýasııalyq ortalyqtarǵa ornalastyrylǵan.
Sondaı-aq, tek osy aýdanda 29 shaǵyn jáne orta bıznes, 13 aýyl sharýashylyǵy nysany, 7 memlekettik jáne áleýmettik nysan zardap shekken.
Komıssııa 415 úıdi qaýipti dep tanysa, onyń 314-iniń ıelerine Petropavldan baspana satyp alynǵan, qalǵandary jańadan salynǵan «Birlik» shaǵyn aýdanynda qonystanǵan.
«Aýdanda 971 úı qalpyna keltirildi. Onyń ishinde 71 úıdi mehanıkalandyrylǵan brıgadalar, qalǵanyn turǵyndardyń ózderi jóndegen. 900 úıdi qalpyna keltirý úshin turǵyndarǵa 5 mlrd teńge bólindi. Barlyq zardap shekken turǵyndar baspanamen qamtamasyz etildi. Maly qyrylǵandar men kásipkerlerge járdemaqy tolyǵymen tólendi», deıdi Qyzyljar aýdandyq ishki saıasat bóliminiń basshysy Gúlııa Saltyqova.