Qazaqstan qor bırjasyndaǵy saýda-sattyqta ulttyq valıýta baǵamy nyǵaıyp, dollar kúrt arzandap ketti. 22 qańtardaǵy saýda qorytyndysy boıynsha USD/KZT jubynyń ortasha baǵamy 1 AQSh dollary úshin 520,88 teńgeni qurady. Al búgingi baǵa 1 dollar úshin 519-524 teńge, dep habarlaıdy Egemen.kz.
Almaty men Astanadaǵy aıyrbastaý pýnktterinde dollar orta eseppen 522-526 teńge aralyǵynda satylyp jatyr. Saýda-sattyq qorytyndysy boıynsha dollardyń ortasha ólshemdi baǵamy 520,91 teńgeni qurap, birden 6,16 teńgege tómendedi. Iýan baǵamy tańǵy saýda-sattyq nátıjesinde 71,56 teńgege deıin tómendedi (-1,13). Aqsha aıyrbastaý oryndarynda dollardy 521,5-524,9 teńgege, eýrony – 542,5-547,5 teńgege, al rýbldi – 5,15-5,27 teńgege satyp alyp/satýda.
Kurs.kz málimetinshe, qazirgi ýaqytta Almatynyń aqsha aıyrbastaý pýnktterinde dollar 530 teńgeden satylyp jatyr, satyp alý baǵamy – 532,5 teńge. Eýro 546 – 549 teńge aralyǵynda qubylyp tur. Al, Astana qalasy boıynsha dollardy satý baǵamy – 531 teńge, satyp alý quny – 533 teńge. Eýro 545 teńgeden satylyp, 550 teńgeden satyp alynady. Dál qazirgi ýaqytta aqsha aıyrbastaý oryndarynda Reseı valıýtasy 5,07 - 5,17 aralyǵynda saýdalanyp jatyr.
Tengenomika Telegram arnasynyń avtory Ǵalymjan Aıtqazınniń aıtýynsha, teńgeniń kúrt kúsh alýyna Reseı rýbliniń baǵamy áser etti. Rýbldiń nyǵaıýyna Tramptyń qyzmetine kirisýi, Ýkraınadaǵy soǵysqa qatysty kelissózderdiń bastalýy, sonymen qatar Reseı bıýdjetiniń ótken aıda qomaqty kiris alýy áser etken. Bul rette sarapshy teńge taǵy da rýbl baǵamy nyǵaıǵan soń, kúsh aldy dep tujyrymdaıdy.
«Osylaısha, teńgeniń rýblge qatysty kezekti sınhrondy qozǵalysy KASE bırjasyndaǵy naryq qatysýshylarynyń baǵytyn taǵy da rastap otyr. Qyzyǵy, sońǵy kúnderi munaı baǵasy birshama tómendegenimen, teńge baǵamy oǵan eshqandaı reaksııa bildirmeı otyr», dep jazady ekonomıst.
20 qańtar kúni Qazaqstan qor bırjasyndaǵy saýda-sattyqta dollardyń «ekpini» basylyp, ulttyq valıýta baǵamy sál-pál nyǵaıǵan bolatyn. Ol kúni dollar orta eseppen 529,8 teńgeden satyldy.