Premer-mınıstr Oljas Bektenov Úkimettiń keńeıtilgen otyrysynda 2024 jyly aýyl sharýashylyǵy men kólik-logıstıka salasynda atqarylǵan jumystardy qorytyndylap, bıylǵy jospardy bólisti, dep jazady Egemen.kz.
Úkimet basshysy Qostanaı oblysynda bıdaıdy qaıta óńdeý jobasy iske asyrylyp jatqanyn aıtty. Jalpy quny 132 mln. dollar bolatyn zaýyt krahmal ónimderi men bıoetanol shyǵarady. Bıyl Túrkistan oblysynda jobalyq qýaty 150 myń tonnany quraıtyn júgeri óńdeý zaýyty da iske qosylmaq.
«Astanada óndiristik qýaty 320 myń tonnaǵa jetetin krahmal, glıýten jáne jemis shyrynyn tereń óńdeýge arnalǵan bıdaı men burshaq daqyldaryn qaıta óńdeý zaýytyn salý jobasy bastaldy. Bıyl Soltústik Qazaqstan oblysynda táýligine 1200 tonna kúnbaǵys óńdeıtin zaýyt ashylady», dedi Oljas Bektenov baıandamasynda.
Premer - mınıstrdiń aıtýynsha, birneshe ınvestorǵa óndiristik qarasora ósirýge ruqsat berilgen.
«Birneshe kompanııaǵa jasandy jaǵdaıda qarasora ósirýge lısenzııa berildi. Atalǵan ónimnen maı, mal azyǵyn, tyńaıtqyshtar jáne talshyq alýǵa bolady», dedi ol.
Bıyl kólik-logıstıka salasynda da júzege asyrylatyn jobalar tanystyryldy. Máselen, «Dostyq-Moıynty» jáne Almaty qalasyn aınalyp ótetin temirjol qurylysy aıaqtalady.
«Darbaza-Maqtaaral» jáne «Baqty-Aıagóz» temirjol magıstralin salý jalǵasýda. «Moıynty-Qyzyljar» jańa temirjol jelisin, sondaı-aq, «Altynkól-Jetigen» ýchaskesiniń ekinshi joldaryn salýdy qarastyryp jatyrmyz», dedi Úkimet basshysy.
Elimizdiń týrıstik áleýetin arttyrý maqsatynda Katonqaraǵaı, Zaısan jáne Kendirli aımaqtarynda áýejaı salynbaq. Oljas Bektenov baıandamasynda Aqtaýda áýe habyn qurý jobasy pysyqtalyp, Kaspıı teńiziniń túbimen talshyqty-optıkalyq baılanys jelisin tartý bastalatynyn atap ótti.