Premer-mınıstr Oljas Bektenov pen Reseı Federasııasy Úkimetiniń tóraǵasy Mıhaıl Mıshýstın ekijaqty kelissóz júrgizdi. Onda eki el prezıdentteri arasynda ekijaqty saýda kólemin arttyrý boıynsha qol jetkizilgen ýaǵdalastyqty iske asyrý máselesi talqylandy.
Kelissózde eki el arasyndaǵy saýda-ekonomıkalyq, ǵylymı-tehnıkalyq jáne mádenı-gýmanıtarlyq yntymaqtastyqty keńeıtý jospary sóz boldy. О́nerkásip kooperasııasy, aýyl sharýashylyǵy, energetıka, kólik ónerkásibi jáne basqa da salalardaǵy ózara is-qımyldy nyǵaıtý jónindegi mindetterdi júzege asyrýǵa nazar aýdardy.
Reseı – Qazaqstannyń basty saýda seriktesteriniń biri. О́tken jyldyń 11 aıynda ózara saýda kólemi 24,2 mlrd dollarǵa jetti. Eki memleket basshylary arasyndaǵy taýar aınalymyn 30 mlrd dollarǵa deıin jetkizý jónindegi ýaǵdalastyqqa qol jetkizý maqsatynda tasymaldanatyn taýarlar atalymyn keńeıtý mańyzdy.
Kezdesýde ekonomıkalyq yntymaqtastyqtyń 2021–2025 jyldarǵa arnalǵan keshendi baǵdarlamasyn iske asyrýdyń oń nátıjesin atap ótip, aldaǵy kezeńge jańartylyp ázirlenetin baǵdarlamany naqtylady. Byltyr 10 aıdyń qorytyndysy boıynsha aýyl sharýashylyǵy ónimderiniń aınalymy 5%-ǵa ósip, 3,2 mlrd dollardan asqan. О́nerkásip kooperasııasy salasynda búgingi tańda 18,6 mlrd dollarlyq birlesken 99 joba iske asyryldy. Elimizde jańa birlesken jobalardy júzege asyrý múmkindikteri qaraldy.
«Eki el arasyndaǵy ózara ınvestısııalar kólemi birqalypty damyp jatyr. Keıingi 20 jylda reseılik ınvestorlar 25,2 mlrd dollar kóleminde tikeleı ınvestısııa saldy. О́z kezeginde otandyq kompanııalar osy kezeńde Reseı ekonomıkasyna 8,7 mlrd dollar ınvestısııa baǵyttady. О́tken jyldyń toǵyz aıynda ǵana reseılik ınvestısııalardyń jalpy aǵyny 43,7%-ǵa ósip, 22,8 mlrd dollarǵa jetti. Qazir elimizde 23 myńnan astam Reseıdiń úlesi bar kompanııa jumys isteıdi. Jalpy, biz jańa óndirister qurýǵa múddelimiz. Reseılik kompanııalarǵa Qazaqstanda birlesken ınvestısııalyq jobalardy iske asyrýǵa belsendi qatysýdy usynamyz», dedi Úkimet basshysy Oljas Bektenov.
Qazaqstan arqyly tranzıttik tasymaldaý joǵary qarqynmen damyp keledi. Osyǵan baılanysty avtokólik jáne temirjol ınfraqurylymyn damytýǵa, sondaı-aq sý kóligi salasynda jańa balamaly baǵyttar ashýǵa kóńil bólinip jatyr. Reseı Premer-mınıstri Qazaqstannyń Eýrazııadaǵy toǵyz joldyń torabyna aınalatynyna senimdi ekenin jetkizdi.
«Biz Soltústik-Ońtústik halyqaralyq dáliziniń damýyna úlken kóńil bólemiz. Bolashaqta ol búkil eýrazııalyq óńir memleketteriniń múddesi úshin jahandyq kólik arterııasyna aınalatynyna senimdimin. Qazaqstan Eýrazııadaǵy toǵyz joldyń torabyna aınalady», dedi M.Mıshýstın.
Oljas Bektenov Memleket basshylary Qasym-Jomart Toqaev pen Vladımır Pýtınniń birlesken kúsh-jigeriniń arqasynda ekijaqty yntymaqtastyq sapaly jańa deńgeıge kóterilgenin atap kórsetti. Mańyzdy mindet – joǵary deńgeıde qol jetkizilgen ýaǵdalastyqtardyń is júzinde oryndalýyn qamtamasyz etý. Qazaqstan Úkimeti tyǵyz ózara is-qımyl jasaýǵa jáne barlyq salada yntymaqtastyqty damytýǵa daıyn ekenin aıtty.
«Qazaqstan – bizdiń strategııalyq seriktesimiz ári odaqtasymyz. Bizdiń qarym-qatynasymyz dostyq, tatý kórshilik, ózara syılastyq jáne bir-biriniń múddelerin eskerý qaǵıdattaryna negizdelgen. Vladımır Pýtınniń Qazaqstanǵa memlekettik sapary barysynda qarym-qatynasymyzdy odan ári damytý jóninde mańyzdy ýaǵdalastyqqa qol jetkizildi. Eki el úkimetteriniń mindeti – kóshbasshylarymyz qol jetkizgen kelisimderdiń múltiksiz oryndalýyn qamtamasyz etý», dep atap ótti M.Mıshýstın.
Kelissózder nátıjesinde taraptar strategııalyq áriptestikti nyǵaıtýǵa jáne barlyq baǵyt boıynsha birlesken jumysty jalǵastyrýǵa kelisti.